Almatyda AQSh-tyń bas konsýly Naýryzben quttyqtaý sharasyndaǵy bıge qatysty
ALMATY. QazAqparat - Almaty qalasyndaǵy AQSh-tyń Bas konsýldyǵy qala turǵyndary men qonaqtaryn Naýryz merekesimen quttyqtady, dep habarlaıdy QazAqparat tilshisi.
AQSh Bas konsýldyǵynyń quttyqtaýy beınetúsirilim arqyly berilgen. Onda quttyqtaý qaladaǵy saýda ortalyqtarynyń birinde dastarhan basynda otyrǵan qazaq pen amerıkalyqtyń áńgimesinen bastalady.
AQSh azamaty: «Naýryz kezinde ne bolady?», dep suraıdy. Oǵan otandasymyz: «Naýryz rýhymen túrli ǵajaıyptar bolýy múmkin» dep jaýap beredi. Sol sátte án oınap, saýda ortalyǵyndaǵy adamdar bıleı bastaıdy.
Bıshiler qazaqtyń «Qamajaı» bıin bıleıdi. Bul quttyqtaý Bas konsýldyqtyń Facebook áleýmettik jelisindegi paraqshasynda jarııalanǵan.
«Ulystyń uly kúni Naýryz meıramymen quttyqtaımyz! Sizderge qazaq halqynyń bıin tartý etemiz! Barlyq kelgenderge alǵysymyzdy bildiremiz!!!», dep jazyldy áleýmettik jelidegi bas konsýldyqtyń jeke paraqshasynda.
