Almatyda Aqsaı kópiri qaıta jasalyp, paıdalanýǵa berildi

ALMATY. QazAqparat - Almatyda Jandosov kóshesi boıyndaǵy Aqsaı ózeni arqyly ótetin kópir qaıta jasalyp, paıdalanýǵa berildi, dep habarlaıdy QazAqparat tilshisi.

Bul nysan 1963 jyly salynǵan bolatyn. Quzyrly organdardan quralǵan komıssııa bul kópirdi 2015 jyly apatty dep baǵalaǵan. Kópir Naýryzbaı jáne Qarasaı aýdandarynyń avtokólikterine arnalǵan. 

«Burynǵy eski kópir túgel buzyldy. Kópirge myqty tirekter men qabyrǵalar ornatyldy. Ótpeli plıtalar jasalyp, qorshaýlar qoıyldy. Eki qabatty asfalt tóselgen jańa kópir paıda boldy. Rekonstrýktsııa kezinde tórt jolaqty kólik qozǵalysy jáne onyń eki jaǵyna trotýar jasaldy. Júzege asqan naqtyly sharalardyń barlyǵy kópir ústimen júretin kólikterdiń joǵary qaýipsizdigin qamtamasyz etedi», - dedi Jolaýshylar kóligi jáne avtomobıl joldary basqarmasynan. 

Eske sala keteıik, ótken aptada «Medeý - Shymbulaq» kópiri de qaıta jasalyp, halyq ıgiligine berilgen bolatyn.