Almatyda «Aqsarbas» fılminiń tusaýy kesildi
ATY. 28 qańtar. QazAqparat /Názıra Eleýhan/ - Qazaq kıno ónerine Qytaıdan «Aqsarbas» atty jańa fılm qosyldy. Keshe Almatyda Tsezar kınoteatrynda atalmysh fılmniń tusaýy kesildi. Kórkem fılm AQSh-tyń Kanada shtatynda ótken halyqaralyq kınofestıvalde úzdik fılmder qatarynan kóringen.
Týyndyny túsirgen QHR-dyń rejısseri - Gaý Fyń, prodıýsseri - QHR-dyń kınofılm jasaý ortalyǵynyń meńgerýshisi Shyń Ze Jún. Stsenarıı avtory - QHR-daǵy Shyńjań-Uıǵyr avtonomııalyq ólkesi Jazýshylar odaǵynyń tóraıymy, jazýshy, aýdarmashy Erkesh Qumanbekqyzy. Fılmge qazaqstandyq akter Nurlan Álimjan túsken. Ol Seri jigittiń rólin somdaıdy.
Fılmge shekara syrtynda qalyp qoıǵan qandastarymyzdyń ertedegi ómir salty, turmys-tirshiligi men kóshpendi qazaqtardyń sahara mádenıeti arqaý etilgen. Kınotýyndyda qazaq eliniń taǵdyry, onyń basynan keshirgen taýqymeti beınelengen.
Fılm Qytaı eliniń, Shynjań-Uıǵyr avtonomııalyq ólkesi Jazýshylar Odaǵy tóraǵasynyń orynbasary Erkesh Qumanbekqyzynyń avtorlyǵymen jáne Qytaı ortalyq televızııasy kınofılm jasaý ortalyǵynyń jetekshiligimen túsirilgen.
Týyndyny birinshi bolyp almatylyqtar tamashalaı aldy. Tusaýkeserge elimizdiń aqyn-jazýshylary, kıno maıtalmandary qatysyp, irgemizdegi alyp ımperııanyń azamattary atanǵan qazaq baýyrlarymyzǵa alǵystaryn bildirdi.
«Biz Qazaqstan egemendigin alǵan jyldardan bastap qarym-qatynasymyzdyń jaqsarǵandyǵyna qýanyshtymyz. Búgingi tanystyrylym da sonyń bir belgisi. Biz qansha jyraqta júrsek te ulttyq tilimizdi umytpaı, dinimizdi saqtap, dilimizdi ulyqtap, ulttyq bolmys-bitimimizdi joǵaltpaı kelemiz. Sondyqtan, qazaqtyń salty-dástúrin kórsetetin fılmderge basty nazar aýdaramyz», - dedi fılmniń stsenarıı avtory Erkesh Qumanbekqyzy.
Belgili aqyn, etnograf Qajytaı Іlııasovtyń aıtýynsha, fılm óz taqyrybyn tolyq ashqan. «Qazaq aqsarbas aıtyp, tilek tilegen. Týyndyny jasaýshylar qozy arqyly bir taǵdyrdy kórsete bilgen. Sonymen qatar, Qytaıdaǵy qazaqtardyń tirshiligin kórsetip, bizdiń turmys- saltymyz ben ádet-ǵuryptarymyzdy jaqsy kórsetken. Ol aldaǵy ýaqytta halqymyzdyń salt-dástúrin jan-jaqty ashyp kórsetýge óziniń oń yqpalyn tıgizeri sózsiz. Búgingi jas kórermenderge qazirgi kınolardaǵydaı jalańash qyz-kelinshekterdi tyqpalaǵansha, osyndaı halyqtyq belgisi, nyshany bar kınolardy, tili ádemi jazylǵan fılmderdi kórsetken paıdalyraq bolar edi», - dep atap ótti Qajytaı Іlııasov tusaýkeser rásiminde.
