Almatyda «Aqnıet sút» saıysynyń 2-nshi kezeńiniń jeńimpazdary anyqtaldy

Baıqaý osy jyldyń aqpan aıynda bastalǵan bolatyn. Toǵyz aı boıy ótetin saıys úsh kezeńge bólingen. Baıqaýǵa qazaqstandyq BAQ-da jarııalanǵan jáne teledıdar efırine shyqqan materıaldar qabyldandy. Jýrnalısterdiń eńbekterin sút salasynyń sarapshylary men "Egemen Qazaqstan" gazetiniń prezıdenti Saýytbek Abdrahmanov bastaǵan, tanymal jýrnalısterden turatyn qazylar alqasy úsh atalym boıynsha baǵalady.

Birinshi "Qazaq tilinde jazylǵan úzdik maqala" atalymynyń úzdik eńbegi dep Soltústik Qazaqstan oblysynyń jýrnalısi Murat Nurmuqanovtyń "Soltústik Qazaqstan" gazetinde jaryq kórgen maqalasy tanyldy. "Info-Tses" gazetiniń tilshisi Andreı Smetskııdiń maqalasy orys tilinde jazylǵan úzdik maqala atandy. Al úshinshi atalym "Úzdik beıne sıýjet" dep "Qazaqstan" telearnasynyń jýrnalısi Áıgerim Aǵyltaevanyń sıýjeti tanyldy. Saıys kezeńiniń jeńimpazdaryna qundy júldeler men dıplomdar tabystaldy.

"Áleýmettik mańyzdy máselelerdiń betin ashqan saıysqa qatysýshylar joǵary deńgeıdegi sheberlikti kórsetti. Saıysqa qatysýshy ár tilshi sút salasynyń barlyq derlik baǵyttaryna, máseleleri men bolashaǵyna, sútti qaıta óńdeýdiń jańa tehnologııalary men osy bir baǵa jetpes ónimdi tutynýdyń paıdasyna basa nazar aýdarǵan", dedi qazylar alqasynyń tóraǵasy, "Egemen Qazaqstan" gazetiniń prezıdenti Saýytbek Abdrahmanov.

Marapattaý saltanatynda sóz sóılegen Sút odaǵy atqarýshy dırektorynyń orynbasary Lıdııa Mıheeva: "Saıys maqsaty - sút salasynyń máseleleri men saýaldaryn jaryqqa shyǵaratyn BAQ-dy qolpashtaý jáne qoldaý", dep atap kórsetti.

3-shi kezeń men bas júldeniń jeńimpazy 3 aıdan soń belgili bolady. Bas júlde - sandyq fotoapparat pen noýtbýk.