Almatyda aqıyq aqyn M. Maqataevtyń 80 jyldyǵyna arnalǵan saltanatty kesh ótti
ALMATY. 31 qańtar. QazAqparat /Názıra Eleýhan/ - Almatyda Ǵ.Músirepov atyndaǵy Qazaq memlkettik akademııalyq balalar men jasóspirimder teatrynda «Sirá, men ólmeıtin shyǵarmyn» degen taqyrypta aqıyq aqyn M.Maqataevtyń 80 jyldyǵy men №140 mektep-gımnazııanyń 20 jyldyq mereıtoıyna arnalǵan saltanatty kesh bolyp ótti.
Poezııa juldyzyna arnalǵan keshte Muqaǵalı Maqataevtiń óleńderi oqylyp, aqynnyń sózine jazylǵan ánder shyrqaldy. Sonymen qatar, «Muqaǵalı» atty qoıylym kórsetildi.
Atalmysh sharaǵa muryndyq bolǵan, M.Maqataev atyndaǵy №140 mektep-gımnazııanyń dırektory Sánııa Tileýbaıdyń aıtýynsha, shara óleń ónerimizdiń kósegesin kógertken tulǵalardyń biregeıi, qazaq klassıkalyq poezııasynyń marqasqasy, ómiri óleń, óleńi ómirge aınalǵan Muqaǵalı Maqataevtyń týǵan kúnine arnalady. «Osy aıtýly mereıtoıǵa oraı bul sharany ótkizip otyrmyz. Mundaǵy maqsat - aqyn óleńderin nasıhattaý, jas óskinniń boıynda patrıottyq sezim tárbıeleý jáne aqynnyń mereıtoıyn halyqqa qala kóleminde usyný bolyp tabylady»,-dedi QR bilim berý isiniń úzdigi Sánııa Tileýbaı.
Onyń aıtýynsha, Muqaǵalı murasy - ulttyq muraǵa qosylǵan asyl qazynalardyń biri. «Búginde Muqaǵalı óleńderin súıip oqymaıtyn qazaq joq. Onyń názik poezııasy jyrsúıer ár jannyń júrekterinen oıyp oryn aldy. Bul Muqaǵalı jyrlarynyń máńgilik ekendigin kórsetedi. Endigi jerde aqynnyń syr sandyǵyn aqtaryp, ony ósý men órkendeýdiń ulaǵatty úrdisine laıyqty paıdalaný mindeti bárimizdiń enshimizde qalyp otyr. Muqaǵalıdaı aqyny bar halyq- baqytty halyq!»,- dep atap ótti Sánııa Tileýbaı.
Keshke kelgen qaýym búgingi urpaqtyń aqyn ónerin, shyǵarmashylyǵyn qasterleı biletindikterine kóz jetkizip qaıtty.
