Almatyda «Aqanaevtar áýletiniń» kórmesi ashyldy
ALMATY. QazAqparat - Almatydaǵy Qasteev atyndaǵy QR Memlekettik óner mýzeıinde tanymal sýretshi Amandos Aqanaevtyń jary ónertanýshy Laýra Orazbekovany eske alýǵa arnalǵan «Aqanaevtar áýleti» kórmesi ashyldy, dep habarlaıdy QazAqparat tilshisi.
Kórmede Aqanaevatar áýletiniń 13 múshesiniń qylqalamynan týǵan týyndylar men Laýra Orazbekovanyń qalamynan týǵan úsh sýreti qoıylǵan. Ekspozıtsııada keskindeme, grafıka, fotojumystar men L.S. Orazbekovanyń 70-ten astam shyǵarmalary bar.
«Men ózimdi bul áýlettiń basshysy sezinbeımin. Bizdiń áýlettiń basy ol - meniń anam. Anamnyń aty - Bıbihan. Ol kisi qolóner sheberi, ismer adam edi. Ol kilem toqyp, tigin tigýmen qatar er shabatyn edi. «Ol 1930 jyldardaǵy ashtyqtan er toqym jasap aman qaldyq qoı» dep eske alyp otyratyn. Ol kezde ertoqym degen eń qundy dúnıe bolǵan. Bir er toqym úshin bir qap júgeri beretin bolǵan. Anamnyń ákesi, atasy da sheber, usta adamdar bolǵan. Men tek sol ónerdi jalǵastyrýshy ǵanamyn. Bul kórmeni biz Astanaǵa daıyndaǵanbyz. QR Mádenıet jáne sport mınıstrligimen kelisimshartqa da otyryp qoıǵanbyz. Alaıda, Laýra Orazbekovanyń qaıtys bolýyna baılanysty kórmeni keıinge shegerip, Almatyda ótkizý týraly sheshim qabyldadyq», - dedi sýretshiler áýletiniń úlkeni Amandos Aqanaev.
«Laýra Orazbekova (1949-2017) Qazaqstandaǵy AICA Ulttyq sektsııasynyń prezıdenti bolady. Bul 1996 jyly ıÝNESKO janynan qurylǵan kórkemsýret synshylarynyń halyqaralyq qaýymdastyǵy. L.Orazbekova elimizdiń mádenı muralaryn saqtaý máseleleri tolǵandyratyn dara tulǵa, tereń bilimdi qaıratker boldy. Ol Qazaqstandaǵy óner máselelerin kásibı túrde qamtıtyn iri «Shahar-Kýltýra» jýrnalynyń kýratory boldy. Shota Ýálıhanov jýrnal týraly bylaı dep jazdy: «Qazaqstandaǵy shyǵarmashyl zııaly qaýymdy bir sanynan kelesi sanyna deıin úmitpen kúttiretin osyndaı úlken basylym bolǵan emes». Árıne, bul Laýra Orazbekovanyń úlken eńbeginiń jemisi ekeni daýsyz», - dedi ónertanýshy, ǵalym Kúljazıra Muqajanova.
