Almatyda akademık Saıym Balmuhanov jaıly kitaptyń tanystyrylymy ótti
ALMATY. QazAqparat- Búgin Almatyda «Ónegeli ómir» serııasy boıynsha akademık Saıym Balmuhanov jaıly shyǵarylǵan kitaptyń tusaýy kesildi.
QR Ulttyq ǵylym akademııasynyń kishi zalynda ótken sharaǵa Saıym Balmuhanovtyń jubaıy, týǵan-týystary, áriptesteri jáne jas ǵalymdar qatysty.
«Bul kitapqa Saıym Balmuhanovtyń óziniń jeke estelikteri, ómirbaıany, buqaralyq aqparat quraldary betinde ǵylym jaıly jazǵan materıaldarynyń kóshirmeleri, ol kisi jaıynda jazylǵan estelikter, ár jyldary túsken sýretteri jáne basqa da materıaldar engizilgen. Saıym Balýanulynyń adam densaýlyǵyna Semeı ıadrolyq polıgonynyń keltirgen zardaptary týraly aıtqan dúnıeleriniń barlyǵy polıgonnyń jabylýyna túrtki boldy. Sondyqtan, osyndaı birtýar tulǵamyzdy umytpaýǵa tıispiz», - dedi óz sózinde ál-Farabı atyndaǵy Qazaq ulttyq ýnıversıteti rektorynyń keńesshisi, fılologııa ǵylymdarynyń doktory Baýyrjan Jaqyp.
QR UǴA akademıgi, medıtsına ǵylymdarynyń doktory, professor Saıym Balýanuly Balmuhanov 2014 jyly 19-shy aqpanda 92 jasqa qaraǵan shaǵynda dúnıe salǵan. Ol Qazaqstanda rentgen-radıologııa jáne radıobıologııa ǵylymdarynyń negizin qalaýshy. Kóp jyldar Onkologııa jáne radıologııa ınstıtýtyn basqardy.
Saıym Balmuhanov kezinde 14 ǵylym doktory men 80 ǵylym kandıdatyna jetekshilik etken.
Aıta ketelik, «Ónegeli ómir»serııasyn ál-Farabı atyndaǵy Qazaq ulttyq ýnıversıteti shyǵarady. Ol Qazaqstannyń iri memlekettik jáne qoǵam qaıratkerlerine, ǵalymdar men pedagogtarǵa arnalǵan. Kúni búginge deıin osy serııa boıynsha 60 kitap shyqqan. Saıym Balmuhanov jaıly 500 danamen shyqqan kitap - 56-shy shyǵarylym bolyp otyr.
