Almatyda akademık Ómirzaq Aıtbaıulynyń 5 tomdyq tańdamaly eńbekteriniń tusaýkeseri ótedi
ASTANA. QazAqparat - Almatyda 7 sáýirde QR Ulttyq kitaphanasynda Halyqaralyq «Qazaq tili» qoǵamynyń prezıdenti, Ulttyq Ǵylym akademııasynyń akademıgi Ómirzaq Aıtbaıulynyń 5 tomdyq tańdamaly eńbekteriniń tusaýkeseri ótedi, dep habarlady uıymdastyrýshylar.
«Qazaq termınologııasynyń máseleleri» atty alǵashqy kitapta termınologııanyń til qurylymyndaǵy róli, júz jylǵa taıaý tarıhy, jasalý kózderi men prıntsıpteri, ádebı tildi damytýdaǵy orny jáne t.b. ózekti máseleler saralanyp, ǵalymnyń tyń kózqarastary usynylady.
«Qazaq frazeologızmderi men perıfrazdary» kitabynda tilimizdegi turaqty frazeologızmderdiń jáne aýyspaly, astarly maǵynadaǵy perıfrazdardyń ár alýan qoldanys ortasyndaǵy tabıǵaty sóz bolady. «Tiltires» atty kezekti tomda qoǵam qaıratkeri Ó.Aıtbaıulynyń memlekettik tildi qalyptastyrý haqyndaǵy oılary men Halyqaralyq «Qazaq» tili qoǵamynyń til maıdanyndaǵy shırek ǵasyrlyq qyzmeti jan-jaqty baıandalady.
«Tilǵumyrlar» kitabynda A.Baıtursynuly, Q.Jubanov bastaǵan tilshi-ǵalymdar, S.Seıfýllınnen bastap І.Jarylqapovqa deıingi til janashyrlary týraly ǵylymı dáıegi joǵary ári kórkem esse turǵysynan jazylǵan qundy eńbekter toptastyrylǵan.
«Osnovy kazahskoı termınologıı» atty sońǵy tomǵa ǵalym eńbekteriniń orystildi aýdıtorııaǵa usynǵan basty-basty ǵylymı tujyrymdary, memlekettik tildiń mártebesin kóterý týraly baıandama, suhbattary engizilgen. Sondaı-aq ǵalym eńbekteriniń tolyq bıblıografııasy men fotoıllıýstratsııalar da qamtylǵan.
Іs-shara aıasynda Ulttyq kitaphananyń qorynan Ó.Aıtbaıulynyń ómiri men shyǵarmashylyǵyna arnalǵan bezendirilgen kitap kórmesi uıymdastyrylady.
