Almatyda akademık D.Sokolskııdiń 100 jyldyq mereıtoıyna arnalǵan ǵylymı konferentsııa ótti
ALMATY. Sáýirdiń 6-sy. QazAqparat /Ádilet Musahaev/ - Almatyda Ál-Farabı atyndaǵy QazUÝ-de kórnekti ǵalym, Qazaqstanda katalızdik hımııanyń negizin salýshy, Sotsıalıstik Eńbek Eri, akademık Dmıtrıı Vladımırovıch Sokolskııdiń 100 jyldyq mereıtoıyna arnalǵan «HHІ ǵasyr katalızi jáne hımııalyq tehnologııa» atty ǵylymı konferentsııa ótti,
dep habarlaıdy QazAqparat.
Akademık Sokolskıı - Qazaqstanda katalızdik hımııanyń negizin salýda jáne damytýda qosqan úlesi zor ǵalym. Onyń ǵylymı eńbekteri men ashqan jańalyqtary katalız teorııasy men praktıkasyndaǵy álemdik qorǵa engizilgen, sonymen birge búgingi kúnge deıin katalızdik, elektrohımııalyq protsesterdiń jańa tehnologııasyn óndiriske engizýmen damytýda negizgi qural bolyp sanalady.
Konferentsııanyń maqsaty - respýblıkanyń ǵylymı jurtshylyǵyn uly ǵalymnyń jeke tulǵasyna kóńil aýdartý, onyń keler urpaqqa qaldyrǵan muralaryn, ǵylymı boljamdaryn, teorııalyq oılaý quraldaryn jáne katalızdiń kóptegen úrdisteri men qubylystaryn tájirıbede júzege asyrýǵa múmkindik jasaý.
«Uly ǵalym Qazaq memlekettik ýnıversıtetinde birinshi katalız jáne tehnıkalyq hımııa kafedrasy men QazSSR ǴA janynda organıkalyq katalız jáne elektrohımııa ınstıtýtyn uıymdastyrýda erekshe eńbek sińirdi», dep atap ótti óz sózinde QazUÝ-diń rektory Baqytjan Jumaǵulov.
QR Syrtqy ister mınıstrliginiń Erekshe tapsyrmalar jónindegi elshisi, hımııa ǵylymdarynyń doktory Aqmaral Arystanbekovanyń aıtýynsha, akademıktiń bilimdarlyǵyna barlyq shákirtteri tańdanyspen qaraǵan. «Onyń dárisin uıyp tyńdaýshy edik jáne ol qıyn taqyryptardyń ózin anyq túsindire biletin. Osyndaı ǵalymnan bilim alyp, sonyń basshylyǵynda jumys istegenimdi maqtan tutamyn», deıdi ol.
Sondaı-aq A.Arystanbekova QazUÝ-diń hımııa fakýltetindegi dáris zaldarynyń birine atalmysh ǵalymnyń atyn berýdi usyndy.
