Almatyda «Aq kógershin» 8-shi halyqaralyq baıqaýy máresine jetti
ALMATY. 9 qarasha. QazAqparat /Názıra Eleýhan/ - Búgin Almatydaǵy Qazaqkontsert zalynda «Aq kógershin» balalar shyǵarmashylyǵynyń jyl saıynǵy respýblıkalyq baıqaýynyń jeńimpazdary anyqtalyp, marapattaý rásimi bolyp ótti.
3 kún boıyna baq talastyrǵan jas daryndardyń ónerin, bilikti ádil qazylar tarazylap, óz baǵasyn berdi.
Qatysýshylar, «Vokal», «Horeografııa», «Ulttyq naqyshta án aıtý», "Balalar sán kórsetilimi" «Biregeı janr» atalymdary boıynsha marapatqa ıe boldy. Al, oza shaýyp, báıge alǵandar shet elderde ótetin halyqaralyq jarystar men festıvaldarǵa qatysýǵa joldama aldy. Baıqaýǵa, Qazaqstannyń túkpir- túkpirinen kelgen 600-den asa balǵyn qatysty. Taıaý shetelderden kelgen qonaqtar da bar. Jyl saıyn dástúrge aınalǵan «Aq kógershinnen» shyqqan daryndar, qazirdiń ózinde Germanııa, Ispanııa, Chehııa, Koreıa, Reseıde laýreat, dıplomant atanyp ta úlgerdi.
«Balalar shyǵarmashylyǵynyń «Aq kógershin» baıqaýy 8 jyl boıy jańa daryndardy ashyp, ónerli balalarǵa kóp kórermenniń aldynda óner kórsetýge, sondaı-aq tájirıbe almasýǵa múmkindik berip keledi",-dedi ádil-qazylar alqasynyń tóraıymy Raıhan Ońǵarova.
Onyń aıtýynsha, jyldan jylǵa baıqaýǵa qatysýshylardyń sanymen qatar, sapasy artyp keledi. "Tek, baıqaýǵa úlken kóńil bólinse eken dep tileımin. Sonymen qatar ata -analarǵa balalarynyń shyǵarmashylyqpen aınalysýyna múmkindik jasasa eken dep aıtqym keledi. Óıtkeni búginde kóp ata-ana jumysta bolǵandyǵynan, balalardyń kópshiliginiń ýaqyty bos ótip jatyr. Eger bala shyǵarmashylyqpen aınalyssa, onda onyń ata-analary balalarymen birge bir tynyspen ómir súretin bolady, bul otbasyn odan ári berik ete túsedi. Otbasy berik bolsa, qoǵamymyz da berik bolady",-dedi Raıhan Ońǵarova.
Baıqaý QR Bilim jáne ǵylym mınıstrliginiń, Almaty ákimdiginiń, qalalyq bilim basqarmasy men Qazaqkontserttiń qoldaýymen ótkizilip keledi.
