Almatyda Aq Azıada alaýyn qorǵaýshylardy irikteýdiń sońǵy kezeńi aıaqtaldy
ALMATY. Qazannyń 19-y. QazAqparat /Erbol Turymbetov/ - Búgin Almatydaǵy «Taýly kún» saýyqtyrý kesheninde VII qysqy Azııa oıyndary alaýyn qorǵaýshylardy irikteýdiń sońǵy kezeńi bolyp ótti.
Bul kezeńde úmitkerler judyryqtasý men 6 shaqyrymǵa júgirý boıynsha synǵa tústi. Sondaı-aq olardyń ár túrli kún raılaryndaǵy qabilettilikteri de tekserýden ótkizildi.
«Alaýdyń 12 qorǵaýshysy qańtardyń 11-30-y aralyǵynda óz jumystaryn uqypty atqarýlary tıis. Búgin bul jerge 34 úmitker jınaldy. Olardyń ishinen 16-sy irikteledi. Al dodaǵa bir apta ýaqyt qalǵanda 12-i túpkilikti alaýdy qorǵaýshy tańdalatyn bolady. Qalǵan tórteýi qosalqy quram retinde alynady», - dedi estafeta dırektsııasynyń jetekshisi Naıl Nurov.
Baıqaý qyrkúıek aıynyń 24-inde bastalǵan bolatyn. Oǵan qoǵamdyq kúzet qyzmetteri men kompanııalarynyń shtattaǵy qyzmetkerleri qatysýda. Baıqaýdyń ótkizilýi úshin qatań talaptar qoıyldy: qatysýshylardyń boıy 180 sm-den kem bolmaýy jáne patrıottyǵy men óziniń mańyzy joǵary isti atqaryp otyrǵanyn túsinýleri kerek. Al oıyn sońynda qorǵaýshylardyń árqaısysyna 150 myń teńge kóleminde eńbekaqy beriledi.
Qazannyń 22-si kúni Astanada Azııa oıyndarynyń alaýy tanystyrylatyn bolady. Alaý «Muzdy alaý» baǵynda janyp turady jáne onda da qatań baqylaýda bolady.
«Biz qazir elimizdiń jetekshi bankteriniń birimen kelissózder júrgizý ústindemiz. Ol boıynsha, alaý elimizdi aralaý kezinde túngi ýaqyttarda bankterde bizdiń qorǵaýshylardyń qaraýymen saqtalady», deıdi N. Nurov.
Alaýdyń Almatylyq júrý joly naqty bekitilmegen. Ázirge taýdaǵy tramplınnen bastalyp, qalanyń iri eskertkishteri arqyly Abaı dańǵylyndaǵy Balýan Sholaq sport saraıynyń aldyna baryp toqtaıdy dep kútilýde.
