Almatyda AITV juqtyrǵan jastarǵa arnalǵan resýrstyq ortalyq ashyldy

ALMATY. QazAqparat- Qazaq dermatologııa jáne juqpaly aýrýlar ǵylymı ortalyǵy janynan AITV juqtyrǵan balalarǵa arnalǵan resýrstyq ortalyq ashyldy. Bul jerde AITV aýrýyna shaldyqqan jasóspirimder men jastarǵa psıhoáleýmettik qoldaý kórsetiledi, dep habarlaıdy QazAqparat tilshisi.

Ortalyqta bilikti mamandar jastarǵa dıagnozyn qabyldaýǵa jáne ómirge beıimdelýge qatysty keńes beredi. Naýqastar munda ózi sııaqty jastarmen tanysady, ózine-ózi kómek kórsetý toptaryna qatysady. Sondaı-aq, resýrstyq ortalyq ınfektsııa juqtyrýdyń aldyn alý jáne salaýatty ómir saltyn nasıhattaý maqsatynda jumys isteıdi.

«AITV (adamnyń ımmýn tapshylyǵy vırýsy) bar jasóspirimder men jastar psıhologııalyq qoldaýǵa asa muqtaj. Olardy qoǵamnan shettetýge bolmaıdy. Kóktemde biz respýblıkalyq kóshbasshylyq mektebin ótkizdik. Sonda baıqaǵanymyz bizdiń balalarymyz jigerli, ózderine senimdi eken. Bul sharadan keıin, olarda ózin-ózi baǵalaý deńgeıi artty, ómirge degen kózqarasy ózgerdi. Bul tásildi resýrstyq ortalyq ary qaraı damytady dep senemiz»,- deıdi Qazaq dermatologııa jáne juqpaly aýrýlar ǵylymı ortalyǵynyń dırektory Baýyrjan Baıserkın.

Ortalyqtyń ashylý rásimine QR Bala quqyqtary jónindegi ýákili Arýjan Saın qatysty.