Almatyda AITV indeti shyqqan aýrýhana jumysyn nege jalǵastyryp jatyr - Erbolat Dosaev jaýap berdi
ALMATY. QazAqparat - Almaty ákimi Erbolat Dosaev qala turǵyndarymen kezdesýinde AITV indetin juqtyrǵan naýqastar anyqtalǵannan keıin ortalyq klınıkalyq aýrýhana basshylyǵyna qandaı shara qoldanylǵanyn jáne medıtsına qyzmetkerleri nelikten áli kúnge deıin jumysyn jalǵastyryp jatyr degen saýalǵa jaýap berdi, dep habarlaıdy QazAqparat tilshisi.
Erbolat Dosaev búginde tergeý júrip jatqanyn atap ótti. Onyń sózinshe, bekitilgen erejege sáıkes, qalalyq JITS ortalyǵymen birlese jumys júrgizilip, reanımatsııa bólimine túsken retsıpıentter, medıtsına qyzmetkerleri jáne basqa da naýqastar tekserildi.
«Osydan keıin 13 maýsym kúni olar erejege sáıkes Almaty qalalyq sanıtarlyq-epıdemıologııalyq baqylaý departamentine jiberildi. 14 maýsym tańerteń qajetti kezekten tys tekserýler belgilendi, jumys búginde jalǵasýda. Keshe Densaýlyq saqtaý mınıstrligi aralyq nátıjelerdi jarııalady. Bireýdi jumystan bosatý úshin aldymen onyń qaıdan kelgenin anyqtaý kerek. Komıssııa jumysyn aıaqtaǵan boıda bul týraly densaýlyq saqtaý mınıstrligi men qoǵamdyq densaýlyq saqtaý basqarmasy habarlaıtyn bolady. Barlyǵyn baqylaýda ustaımyz», - dedi ákim.
Keshe Densaýlyq saqtaý mınıstrligi Almaty aýrýhanasynan AITV juqtyrǵan úsh naýqaspen baılanysta bolǵan 593 adam tekserilip jatqanyn málimdegen edi.
Eske sala keteıik, Almaty ortalyq klınıkalyq aýrýhanasynda jatqan úsh naýqastan AITV anyqtalǵan bolatyn.
