Almatyda AITV epıdemııasyn baqylaý jobasy aıasynda 6 myńnan astam adam tekserildi

ALMATY. QazAqparat - Almatyda sońǵy eki jyldan beri AITV epıdemııasyn baqylaý jobasy júzege asyp keledi. Bul týraly Óńirlik kommýnıkatsııalar qyzmeti brıfıngisinde AITV epıdemııasyn baqylaý boıynsha Almaty modeli jobasynyń dırektory, Kolýmbııa ýnıversıteti janyndaǵy ICAP Mıra Saýranbaeva aıtty, dep habarlaıdy QazAqparat tilshisi.

Atalmysh joba AITV-men kúres jónindegi «Qalalar-modelder» RADIAN Elton Djon qorynyń aýqymdy bastamasy aıasynda qurylǵan.

«Onyń maqsaty – qala turǵyndaryna stıgmatızatsııasyz jáne kemsitýsiz AITV-ınfektsııasynyń tıimdi túrde aldyn alý. Testileý jáne emdeýge kedergisiz qoljetimdilikti qamtamasyz etýde turaqty, keshendi jáne tıimdi qalalyq baǵdarlama qurý», - dedi spıker.
Joba aıasynda qala ákimdigi, Almaty qalalyq qoǵamdyq densaýlyq saqtaý basqarmasy, JITS-tiń aldyn alý, oǵan qarsy kúres ortalyǵy jáne úkimettik emes uıymdarmen seriktestikte jumystar jasalady.
«Jobada ártúrli tsıfrlyq tehnologııalar belsendi túrde qoldanylady. Mysaly, baılanysqa deıingi aldyn alýda dári-dármek alý úshin dárigerge barý týraly avtomatty SMS eskertýler, seriktester habarlamalarynyń balamaly túrleri, áleýmettik jelilerde, messendjerlerde aqparattandyrý keńinen qoldanylady. «Patsıent mektebi» Telegram boty» ázirlendi. Onda emdelýshiler dárigerge, psıhologqa, keńes berýshige suraqtar qoıyp, kómek kórsetý tobynyń onlaın chatyna qosyla alady»,- dedi Mıra Saýranbaeva.
Ol sondaı-aq joba aıasynda eki jyl ishinde halyqtyń negizgi toptarynyń 6 myńnan astam ókili túrli profılaktıkalyq, áleýmettik jáne quqyqtyq qyzmettermen qamtylǵanyn jetkizdi.