Almatyda Ahmetjan Esimov Respýblıka Saraıynyń qurylysy barysymen tanysty

Esterińizge sala ketsek, bul mádenıet oshaǵyna salynǵannan beri eshqandaı jóndeý jumystary júrgizilmegendikten, ótken jyly kúrdeli jóndeýge jabylǵan bolatyn. Respýblıka Saraıyn jóndeý jumystary 2011 jyldyń aıaǵynda aıaqtalady dep kútilýde.

Ahmetjan Esimov Respýblıka Saraıyndaǵy kúrdeli qurylystyń sapasyna barynsha nazar aýdardy.

Qazirgi kezde Arhıtektýra jáne qurylys ǵylymı-zertteý ınstıtýtynyń beldi mamandary qurylysshylarmen birge baǵanalar men ǵımarattyń tóbesin bekitý jumystaryn qolǵa alýda. Sonymen qatar, 300 avtokólik turatyn oryn da salynyp, ǵımarattyń ishki qurylymy da túgeldeı jańartylýda. Mádenıet oshaǵynda múgedek adamdardyń kirip-shyǵýy da qarastyrylǵan. Saraıdy jóndeý jumystarynyń jospary túgeldeı qaıta jańartyldy, sonyń arqasynda munda 50 oryndy konferents-zal, sulýlyq salony, aýdıokıoski, án jazý stýdııasy, ózge de bólmeler qosymsha salynýda.

Mamandardyń aıtýynsha, ǵımarattyń ishki jáne syrtqy kelbeti búgingi zaman talabyna saı qaıta jańartylatyn bolady.

Árleý jumystaryna barynsha sapaly, ekologııalyq jaǵynan paıdaly, qaýipsiz, estetıkalyq talǵamǵa saı materıaldar paıdalanylýda.

Ahmetjan Esimov ǵımaratty paıdalaný kezinde qaýipsizik sharalaryna barynsha nazar aýdarý qajettigin atap kórsetti.