Almatyda aǵylshyn tilinde murajaılarǵa arnalǵan kitapshalar jaryq kórdi
ALMATY. 25 qańtar. QazAqparat /Názıra Eleýhan/ - Búgin Almatyda British Council halyqaralyq uıymynyń uıymdastyrýymen ótken "Murajaılardaǵy aılyq" jobasynyń birinshi kezeńi aıaqtaldy. Osyǵan baılanysty búgin British Council keńsesinde saltanatty kesh ótti.
Esterińizge sala ketsek, joba 2010 jyldyń mamyr aıynda British Council uıymynyń qarjylandyrýymen bastalǵan bolatyn. Onyń basty maqsaty - halyqaralyq standarttarǵa saı murajaılar úshin jolserikter men kitapshalardy aǵylshyn tiline aýdarý bolyp tabylady. Jobanyń birinshi kezeńine 18 murajaı qatysty. Al, jobaǵa atsalysqan JOO-nyń eriktileri -stýdentter kitapshalardy aǵylshyn tiline aýdarǵan bolatyn.
Sharada British Council halyqaralyq uıymynyń dırektory Lına Meloshevıch murajaı qyzmetkerlerin, bilim berý mekemeleriniń, halyqaralyq uıymdardyń ókilderin, sonymen qatar eriktilerge alǵysyn bildirip, sertıfıkattarmen jáne arnaıy syılyqtarymen marapattady. Sonymen qatar, ol jobaǵa qatysqan, elimizdiń ár jerinde ornalasqan murajaı ókilderine aǵylshyn tilinde basylyp shyqqan jolserikter men kitapshalardyń tegin 1000 danasyn, sondaı-aq, olardyń elektrondyq nusqasyn tabystady.
"2011 jyly biz áli de osyndaı kitapshalardy Qazaqstannyń 10 murajaıyna jasap shyǵarýdy jalǵastyramyz. Negizinen jyl sońyna deıin 28 murajaıdy qamtýdy kózdep otyrmyz. Bıylǵy shyqqan kitapshalar taǵy da basylyp shyǵatyn bolady. Jobany iske asyrýǵa 10 myń fýnt sterlıng jumsaldy. Aldaǵy ýaqytta saıt jasaýdy qolǵa alǵaly otyrmyz. Eger ol saıt jasalsa, bizdiń barlyq materıaldarymyz ǵalamtor arqyly bárine qoljetimdi bolar edi. Osy jumystardy iske asyrý úshin kommertsııalyq uıymdardy tartpaq oıymyz bar", - dedi British Council halyqaralyq uıymynyń dırektory Lına Meloshevıch. Onyń aıtýynsha jobaǵa jalpy sany 100 adam qatysqan.
Mádenıet mınıstrliginiń ókili, bas sarapshy Oljas Sherııazdanov, mınıstrliktiń atynan kólemdi joba úshin alǵysyn bildirip: "Respýblıkamyz úshin bul sharanyń mańyzdylyǵy zor. Teatr ilgishten bastalsa, elimiz murajaıdan bastalady, sondyqtan joba aıasynda daıyndalǵan bul kitapshalar elimizdiń baı mádenıeti men tarıhı murasyn nasıhattaýdaǵy taptyrmas qural jáne Azıada kezinde aǵylshyn tildi qonaqtar úshin tabylmas kómek bolmaq", -dedi.
