Almatyda agrarlyq naryq ınnovatsııasy týraly respýblıkalyq ǵylymı-tájirıbelik semınar bolady
ALMATY. 23 shilde. QazAqparat /Erlik Erjanuly/ - Almatyda 27-28 shilde kúnderi «Agrarlyq naryq ınnovatsııasy jáne óndiris arqyly - kúshti Qazaqstandy birge qalaımyz» dep atalatyn respýblıkalyq ǵylymı-tájirıbelik semınar ótedi.
Ony Qazaq ulttyq agrarlyq ýnıversıtetimen «KazAgro» ulttyq holdıngi birlesip uıymdastyryp otyr. Onda údemeli ındýstrıaldyq-ınnovatsııalyq damý baǵdarlamasyn júzege asyrý jáne Astana men Almaty qalalarynda azyq-túlik beldeýin qalyptastyrý sheńberindegi kókeıkesti máseleler talqylanbaq. Semınar barysynda Qazaq ulttyq agrarlyq ýnıversıtetindegi Qazaq-Japon ınnovatsııalyq ortalyǵynda júzege asyrylǵan jáne josparlanyp otyrǵan jobalar men ǵylymı zertteý ortalyqtary, ınnovatsııalyq zerthanalardaǵy ýnıversıtet ǵalymdarynyń ǵylymı jumystarynyń tusaýkeseri bolady. Oǵan QR Aýyl sharýashylyǵy mınıstrliginiń, oblystyq ákimshilikterdiń, áleýmettik-kásipkerlik korporatsııalardyń, sharýa qojalyqtarynyń jáne fermerlik sharýashylyqtardyń ókilderi qatysady.
