Almatyda aǵasyna arasha túsken jigitti óltirgen adam ustaldy
ALMATY. QazAqparat - Almatyda qart kisiniń telefonyn tartyp almaq bolǵan adamǵa qarsylyq kórsetken jigit kisi qolynan kóz jumdy, dep habarlaıdy QazAqparat tilshisi.
Qaıǵyly oqıǵa búgin Raıymbek-Rozybakıev kósheleriniń qıylysynda bolǵan. Bul týraly vıdeo Vkontakte jelisindegi «ıA ochevıdets Almaty» pablıginde jarııalandy.
Polıtsııa departamentiniń habarlaýynsha, Anosov kóshesiniń 53 jastaǵy turǵyny aýlada turǵanda qasyna bir mas jigit kelip, telefonyna talasa bastaǵan. Sol sátte er adam úıindegi baýyryn shaqyrǵan.
«Arasha túspek bolǵan jas jigit pen buzaqynyń arasynda tóbeles bolǵan. Keıin kúdikti jas jigittiń júrek tusynan pyshaq salǵan. Ol alǵan jaraqatynan sol jerde kóz jumdy. Polıtsııaǵa habarlama túsken soń operatıvti qyzmet ókilderi aınalany tintip shyqqan. Qylmysker jeke úılerdiń biriniń monshasynyń tóbesinde tyǵylyp otyrǵan jerinen tabyldy. Ol pyshaǵymen polıtsııaǵa qarsylyq kórsetti. Alaıda, birneshe mınýttan soń polıtsııa ony ustady», - dedi Almaly aýdandyq polıtsııa basqarmasynyń ókili Tańat Nazanov.
26 jastaǵy Taldyqorǵan týmasy buryn da birneshe ret urlyq jasaǵany úshin isti bolǵan.
Bul derek boıynsha QR QK 99-babymen sotqa deıingi tergeý amaldary bastaldy. Kúdikti ýaqytsha oqshaýlaý ornyna qamaldy.
