Almatyda aǵashtardy zańsyz kesken jer ıesine aıyppul salyndy
ALMATY. QazAqparat – Almatyda aǵashtardy zańsyz kesken jer ıesine aıyppul salyndy, dep habarlaıdy QazAqparat tilshisi.
Qala turǵyndary týberkýlezge qarsy dıspanserdiń aýmaǵynda aǵashtardyń jappaı kesilýine shaǵymdandy. Bul habarlamany alǵan Almaty jasyl ekonomıka basqarma qyzmetkerleri kórsetilgen mekenjaıǵa bardy. Bul burynǵy týberkýlezge qarsy emhana ekeni belgili boldy. Menshik ıesi - jeke tulǵa, oǵan qatysty ákimshilik quqyq buzýshylyq týraly hattama toltyryldy.
«Atalǵan ýchaskeni tekserý barysynda 70 japyraqty jáne jemis aǵashtaryn kesý faktisi rastaldy. QR Ákimshilik quqyq buzýshylyq týraly kodeksiniń 386-baby boıynsha aıyppul salyndy. Sondaı-aq, ótemdik retinde 350 aǵash kóshetin otyrǵyzýǵa kepildik alyndy. Aǵashtardy ústimizdegi jyldyń 25 sáýirine deıin otyrǵyzady jáne 2 jyl oǵan kútim jasaıdy», - dep habarlady Jasyl ekonomıka basqarmasy.
Aıta ketý kerek, Almatyda kesilgen aǵash shyǵynyn óteýdiń ádisi jasaldy, sonyń arqasynda keltirilgen zalaldyń naqty baǵasy anyqtalady. Aǵash apatty jaǵdaıda kesilse, onyń ornyna bir aǵash otyrǵyzylady, eger zańsyz alynsa, onda bir aǵashtyń ornyna 100 túp otyrǵyzylady. Jasyl jelektiń kepil merzimi – 3 jyl.
Eske salaıyq, 2019 jyly 28 jeltoqsanda QR Prezıdenti «Almaty qalasynyń erekshe mártebesi týraly» Zańyna qol qoıdy.
