Almatyda aǵashtar jaz aıaqtalǵansha qandalaǵa qarsy taǵy eki ret óńdeledi
ALMATY. QazAqparat - Almaty ákimi Erbolat Dosaev Bostandyq aýdanynyń turǵyndarymen kezdesý kezinde qala turǵyny nelikten aǵashtar burynǵydaı ákpen óńdelmeıtini týraly suraq qoıdy, dep habarlaıdy QazAqparat tilshisi.
«Aýladaǵy aǵashtar nelikten burynǵydaı áktelmeıdi? Áktiń bakterıtsıdtik qasıeti bar ǵoı. Bizde eshqashan aǵash qandalasy bolǵan emes. Qazir barlyq jerde qaptady. Saldarynan aǵashtyń qabyǵy qurıdy. Biz sheshim qabyldaýymyz kerek, onsyz da túngi saǵat 2-de adamdarǵa eskertýsiz óńdeý júrgiziledi. Qandala ólgenimen, adamdar sol aýamen dem alady ǵoı», - dedi aýdan turǵyny.
Almaty ákimi Erbolat Dosaev búgingi kúni aǵashtardy óńdeýge ák emes, bıologııalyq ónimder qoldanylatynyn aıtty.«Bir kezderi ákteý arqyly aǵashtardy óńdeýdiń tıimdi ádisi bolǵan. Ókinishke oraı, klımat qana emes, jalpy qalanyń ekojúıesi ózgerdi. Qala aǵashtardy ákpen óńdeı almaıdy, sebebi, Ósimdikterdi qorǵaý jáne karantın ınstıtýty aǵashty ákteýge keńes bermeıdi. 2016 jyldan bastap aǵashtardy óńdeýde ák qoldanylmaıtyn boldy. Búgingi kúni osy maqsat úshin bıologııalyq ónimder qoldanylady. Bıyl shilde-tamyz aılarynda óńdeýdiń taǵy eki kezeńin júrgizemiz. Ol keste boıynsha túnde ótkiziledi», - dedi Erbolat Dosaev.
Ol sondaı-aq qala turǵyndaryn habarlandyrý úshin árbir PIK, MIB-tiń chattaryna aǵashtardy óńdeýdiń ýaqyty týraly aqparattar jiberýge tapsyrma beretinin aıtty.
Aıta keteıik, bıyl Almatyda japyraq jegish zııankester men sańyraýqulaq aýrýlarynyń qozdyrǵyshtaryna qarsy 2,3 mıllıonnan astam aǵash tórt ret óńdeýden ótti. Ákimdiktiń málimetinshe, ol úshin qaýiptiligi tómen bıologııalyq preparat qoldanyldy.
«Bul qorshaǵan ortaǵa, adamdardyń densaýlyǵyna, janýarlarǵa, qustarǵa, jándikterge zııany joq preparattar», - dep habarlady Almaty ákimdiginiń baspasóz qyzmeti.
