Almatyda aǵashtar búrshik jaryp, qala san túrli túske boıaldy
ALMATY. QazAqparat – Almatyda aǵashtar búrshik jaryp, kóktemniń hosh ıisi ańqydy. Qala alýan túrli túske boıaldy, dep habarlaıdy QazAqparat tilshisi.
Almaty – kóktem mezgilinde erekshe ásemdenip, myń túske boıalady. Qazir qalada eń aldymen órik, shıe aǵashtary gúldep, qalanyń kórkine sulýlyq qosýda. Aınala jasyl túske boıalyp, qala ishinde hosh ıis ańqıdy. Qala turǵyndary da kóp ýaqytyn dalada ótkizip, taza aýada jıi serýendep júr.
QazAqparat fototilshisi qaladaǵy kóktemniń ásem kelbeti men gúldep jatqan aǵashtardy fotoǵa túsirgen edi.
Aıta keteıik, búgin naýryz aıynyń sońǵy kúni, erteń sáýir aıy bastalady. Burynǵylar bul aı týraly «Sáýir aıy – qazaqtyń táýir aıy» degen. Al marqasqa aqyn Muqaǵalı Maqataev «Sáýir aıy shopanǵa saryýaıym, malmen birge baǵady aýa raıyn» dep jyrlady. Sondaı-aq bul aı týraly halqymyzda «Naýryz – sýymen, sáýir – nýymen, mamyr – gúlimen», «Sáýir bolmaı, táýir bolmas» degen maqal-mátel, qanatty sózder bar.
