Almatyda aǵash túbinen kólik qaqqan 5 jasar bala tabyldy
ALMATY. QazAqparat - Almatyda 5 jasar balany kólik qaǵyp ketti. Qazir sábıdiń ata-anasy oqıǵa kýágerlerin izdestirip jatyr, dep habarlaıdy QazAqparat tilshisi.
Instagram áleýmettik jelisinde ál-Farabı dańǵylynda bolǵan jol apaty týraly jazyldy. Brıanskaıa kóshesiniń qıylysynda 5 jastaǵy balany belgisiz kólik qaǵyp ketken. Saldarynan sábıdiń bas súıeginiń jarty bóligi zaqymdanǵan.
«Biz tasjoldan 100 metr jerde turamyz. Men úıden jumysqa shyqqanmyn. Kólikke otyryp, artyma qaramastan júrip kettim. Balalar aýlada oınap júrgen. Kishi ulym artymnan júgirip shyqqan bolýy kerek. Onyń kólik astyna qalaı túsip qalǵanyn bilmeımin. Balanyń joqtyǵyn bilgen soń úıdegiler túgel izdep shyqqan. Bizden sál joǵary turatyn tanystarymyz vıdeojazbany kórsetti. Onda basy qan-josa bolyp jatqan balamdy tanydym. Kórshiler ony aǵashtyń túbinen taýyp alǵan. 5 jastaǵy bala aǵash túbine ózdiginen baryp otyrmaıtyn shyǵar?!», - dedi zardap shekken balanyń ákesi Murat.
Qazir bala qaladaǵy aýrýhanalardyń birinde jatyr. Balaǵa hırýrgter ota jasap jatyr.
Dárigerler balanyń jaǵdaıy jaqsaratynyna úmitti.
Qazir polıtsııa qyzmetkerleri balany soqqan kólikti vıdeotirkegishter arqyly izdestirip jatyr.
Aıta keteıik, áleýmettik jelide pikir jazyp jatqandar balany kórshisi qaǵyp ketkenin aıtýda. Polıtsııa bul nusqany da tekserýde.
