Almatyda ádil sheshim shyǵarmaǵan sýdıa sottalyp jatyr
ALMATY. QazAqparat - Almatyda 5 balaly áıeldiń úıin tartyp alý týraly sheshim shyǵarǵan sýdıa Ómirzaq Serimov sot aldynda jaýap beretin bolady, dep habarlaıdy QazAqparat tilshisi.
Qalalyq sottyń baspasóz hatshysy Dıas Mahambetovtyń aıtýynsha, Alataý aýdanynyń burynǵy sýdıasy Ómirzaq Serimov QR QK 350-babynyń 2-bólimi, 307-babynyń 4-bólimi boıynsha óziniń ókilettigin asyra paıdalanyp, kórineý ádiletsiz sheshim shyǵarǵany úshin aıyptalyp otyr.
Qylmysy dáleldengen jaǵdaıda ol birinshi bap boıynsha 2-7 jyl, ekinshi bap boıynsha 8 jylǵa deıin bas bostandyǵynan aırylýy múmkin.
Búgin qorǵaýshylardyń kelmeýine baılanysty sot aldyndaǵy tyńdaý protsesi bolmady.
Aıta ketý kerek, qaıǵyly oqıǵa 2012 jyly bolǵan edi. 5 balanyń anasy, 57 jastaǵy áıel Svetlana Turǵanbaeva úıin tartyp alýǵa kelgen sot oryndaýshylarynyń, kórshileriniń otbasynyń aldynda ózin ózi benzın quıyp, ózin ózi órtep jibergen bolatyn. Denesiniń 85 paıyzyn kúıik shalǵan áıel aýrýhanada úsh kúnnen soń qaıtys boldy.
Turǵanbaeva bul úıdi bir áıelden satyp alǵan. Aldyńǵy qojaıyny ony azamattyq nekedegi kúıeýi qaıtys bolǵanda mura retinde rásimdep alǵan eken.
Bir jyldan soń qaıtys bolǵan er adamnyń inisi Turǵanbaevtar otbasymen sottasa bastaıdy.
Osylaısha is sotqa jetip, Alataý aýdandyq sotynyń sýdıasy Ómirzaq Serimov Turǵanbaevanyń úıdi satyp alý týraly kelisim shartty joqqa shyǵaryp, jyljymaıtyn múlikti inisine berý týraly sheshim shyǵarǵan.
