Almatyda «Ádil saılaý úshin» qozǵalysy jumysyn bastady

ALMATY. QazAqparat – Almaty óńirlik kommýnıkatsııalar qyzmeti alańynda «Qazaqstan zańgerler odaǵy» Almaty fılıalynyń tóraǵasy, «Ádil saılaý úshin» qalalyq shtabynyń basshysy Baýyrjan Maqulbaev Almatyda «Ádil saılaý úshin» qozǵalysy qurylǵanyn málimdedi, dep habarlaıdy QazAqparat tilshisi.

Spıkerdiń aıtýynsha, qozǵalystyń basty mindeti – saılaý naýqanynyń barysyn quqyqtyq monıtorıngileý jáne daýys berýshi azamattarǵa saılaý zańnamasyn qoldaný tártibin túsindirý bolyp tabylady.

«Qozǵalystyń shtabynda elimiz ben shetelge tanymal belgili zańgerler bar. Jalpy, «Ádil saılaý úshin» qozǵalysy saılaý naýqanynyń barysyn baqylaý aıasynda BAQ-pen, úkimettik emes jáne halyqaralyq uıymdarmen ózara is-qımyldy kúsheıtýge baǵyttalǵan», - dedi spıker.

Ol sondaı-aq saılaý naýqany 21 qazan, saǵat 18:00-de bastalyp, 19 qarasha, saǵat 00:00-ge deıin 28 kúnge sozylatynyn, 19 qarasha - únsizdik kúni ekenin eske saldy.

«QR-daǵy saılaý týraly» Zańǵa sáıkes saılaý kúni jáne onyń aldyndaǵy kúni kez kelgen úgit-nasıhatqa tyıym salynady. Saılaý aldyndaǵy úgit-nasıhat jumystary kandıdattardy tirkeý merzimi aıaqtalǵan sátten bastalyp, saılaý kúni aldyndaǵy kúnniń jergilikti ýaqyty boıynsha túngi saǵat 00.00-de aıaqtalady. Saılaý qorytyndylary saılaý ótkennen keıin jeti kún merzimnen keshiktirilmeı shyǵarylady» - dedi Baýyrjan Maqulbaev.

Eske salaıyq, QR Prezıdentiniń kezekten tys saılaýy 20 qarashada ótedi.