Almatyda «Ádemi-Aı» kompanııasynyń óner murajaıy ashyldy
ALMATY. 20 sáýir. QazAqparat /Názıra Eleýhan/ - Búgin Almatyda «Ádemi-Aı» kompanııasynyń óner murajaıynyń ashylýy saltanaty bolyp ótti.
Óner murajaıyna atalmysh kompanııanyń prezıdenti, QR Mádenıet qaıratkeri, elimizdegi sanaýly jádiger jınaýshylardyń biri Bahargúl Tólegenqyzynyń 1000-nan astam jádigerlerinen tańdalyp alynǵan toptamalary qoıylǵan. Qazaq halqynyń kóne tarıhynan syr shertetin jádigerlerdi Bahargúl Tólegenqyzy 15-jyl boıy jınap, keıbireýlerin qıyn-qystaý kezeńderde óz qarjysyna satyp alyp, kollektsııalarynyń qataryna qosqan.
«Ózderińiz bilesizder, men sońǵy 4 jyl kóleminde Astana jáne Almaty qalalarynda «Júregimde - Otanym» degen atpen jyl saıyn dástúrli túrde kórme ótkizip kelemin. Osy jyly kórmeniń órisin keńeıtip, óner súıer qaýymyna úlken syı jasaýdy, óner úıin, onyń ishinde, jeke óner murajaıyn ashýdy jón kórdim. Árıne ondaǵy maqsat - mádenı qundylyqtarymyzdy jańǵyrtý bolyp tabylady», - dedi ol.
Bahargúl Tólegenqyzy Qytaı Halyq Respýblıkasynyń Sháýeshek qalasynda dúnıege kelgen. Ol Beıjiń memlekettik ýnıversıtetiniń bıologııa fakýltetin bitirip, keıinnen týǵan Otany - Qazaqstanǵa 1994 jyly qonys aýdarady. B.Tólegenqyzynyń kóne, jádigerlik dúnıelerdi jınaýy sol Qytaı elinen bastalǵan. Atamekenge kelisimen, qyzyǵýshylyǵyn jalǵastyryp, el aralap, tarıhymyzdyń san túrli qatparynyń syryn ashaatyn jádigerlerdi jınaýdy ári qaraı jalǵastyrady. 2009 jyly ol Qazaqstan Respýblıkasynyń Mádenıet qaıratkeri atansa, 2010 jyly «Qazaqstan áıeli-2010» baıqaýynyń laýreaty, sonymen qatar, B.Momyshulynyń 100 jyldyq mereıtoıyna arnalǵan «Saýap» ordeniniń ıegeri atandy.
