Almatyda ádebı shyǵarmalarǵa dástúrli "Daraboz" konkýrsy jarııalandy

Sharany uıymdastyrýshylar - "ZHERSU" korporatsııasy men Qazaqstan Jazýshylar odaǵy.

«Báıgege balabaqsha tárbıelenýshilerine, 1-8 synyp oqýshylaryna arnap jazylǵan prozalyq, poezııalyq jáne shaǵyn sahnalyq qoıylymdar qabyldanady. Shyǵarmalar kólemi: povester - 20-25 betten, áńgimeler, ertegiler - 10 betten, toptama óleńder, ertegi-óleńder, balladalar, shaǵyn poemalar, sahnalyq qoıylymdar - 5-10 betten aspaýy shart. Báıgege tek bir ǵana shyǵarma (toptama óleńderden, balabaqsha búldirshinderine arnalǵan qysqa áńgimelerden basqasy) jiberilýi tıis», - deıdi sharanyń uıymdastyrýshysy, belgili balalar jazýshysy Sháken Kúmisbaıuly.

Onyń aıtýynsha, báıgege usynylatyn shyǵarmalardyń kompıýterlik standartqa saı 14 keglmen (aralyq 1,5) terilip, úsh dana bolyp basylyp, durys bettelýine qatań talap qoıylady. «Bul sharttar saqtalmaǵan týyndylar qazylar alqasynyń talqysyna jiberilmeıdi. Buryn jaryq kórgen nemese báıge ýaqytynda basylymdarda jarııalanǵan jáne kórsetilgen merzimnen keshikken shyǵarmalar báıgege qatystyrylmaıdy. Báıgege jazýshylarmen qatar jas talapkerlerdiń de, sheteldegi qalamger qandastarymyzdyń da (búgingi qazaq álipbıimen (kırıllıtsamen) jazylýy mindetti) qatysýyna bolady. Júlde alǵan shyǵarmalar ótken jylǵydaı eki tilde (qazaq, orys) kitap bolyp shyǵyp, ádettegideı respýblıka mektepterine tegin taratylady. Bul sharaǵa qatysty, atap óterlik bir jaıt, bıylǵy syıaqy kólemi eki esege ósti. Sol sebepten, qoıylar talap ta qataıatyn bolady»,- dep atap ótti ol.

Sháken Kúmisbaıuly sonymen qatar qatysýshylarǵa qoıylatyn eskertýlerdi de aıtty. «Jabyq báıge bolýy sebepti, avtordyń búrkenshik atynyń anyqtamasy, aty-jóni, meken-jaıy, baılanys telefony jazylǵan paraq kishi konvertke salynyp, jelimdelip, onyń betine avtordyń tek búrkenshik aty ǵana jazylady. Budan burynǵy "Daraboz" báıgesine qatysqandaǵydaı, óz meken-jaı, aty-jónderińizdi kishi konverttiń syrtyna jazyp qoıyp júrmeńizder. Poshta bólimsheleri tarapynan kezdeser qıyndyqtardy da jaqsy bilemiz. Sol sebepti úlken konvert syrtyndaǵy aty-jóni degen jerge búrkenshik atty nemese basqa bir laqap atty jaza salýǵa da bolady», - dedi ol.

Shyǵarmalar 2011 jyldyń 10 sáýirine deıin qabyldanyp, báıge qorytyndysy Halyqaralyq balalardy qorǵaý kúni qarsańynda shyǵarylady.

Bas báıgege - 700 myń teńge tigilgen;

Birinshi báıge (ekeý) - 340 myń teńgeden;

Ekinshi báıge (ekeý) - 160 myń teńgeden;

Úshinshi báıge (úsheý) - 100 myń teńgeden;

Yntalandyrý báıgesi (tórteý) - 72 myń teńgeden.

Ótinishter tómendegi uıymdastyrý komıssııasynyń meken-jaıy boıynsha qabyldanady: 050063, Almaty qalasy, "Daraboz" báıgesi. №010057505 kýálik ıesine.