Almatyda ádebı «OSKAR» syılyǵy tabys etildi
ALMATY. QazAqparat -Almatyda táýelsiz «Altyn qalam» ádebı júldesin uıymdastyrýshylar qazirgi zaman ádebıetiniń, kitap naryǵynyń damýyna úles qosqan jandarǵa arnaıy syılyq tabys etti, dep habarlaıdy QazAqparat.
«Altyn qalam» ádebı syılyǵyn uıymdastyrý komıtetiniń múshesi Kenje Juman ádebı «Oskarǵa» laıyq dep tanylǵan adamdar qalaı iriktelgenin aıtty.
«Altyn qalam» ádebı baıqaýyn biz 2017 jyly 6-shy ret ótkizdik. Kelesi baıqaýǵa deıin jurttyń nazaryn ádebıetke burý úshin taǵy da qosymsha sharalar uıymdastyrýdy jón kórip, osy ádebı «Oskardy» oılastyrdyq. Maqsatymyz - 2017 jyldy qorytyndylaý. 2017 jyly qandaı kitap, qandaı baspager, qandaı metsenat ádebıettiń damýyna úles qosty, sony anyqtap, marapattaǵymyz keldi. Biz úzdikterdi tańdaý úshin áleýmettanýshylardyń qyzmetine júgindik. Olar qańtar aıy boıy saraptama jasap, eń úzdikterdi anyqtap berdi. 5 atalym boıynsha 5 tulǵany ádebı «Oskarǵa» laıyq dep taptyq», - dedi Kenje Juman.
Ádebı «Oskar» 5 atalym boıynsha 5 adamǵa tabys etildi. Ony «Altyn qalam» uıymdastyrý komıtetiniń músheleri: Aıdos Sarym, Rasýl Jumaly, Nurjan Jalaýqyzy, Dosym Sátpaev, Qýat Dombaı syndy ár salanyń belgili mamandary iriktegen. Sonymen, 2017 jyldyń eń úzdik «Jyl baspageri» syılyǵyna Mereke Qulkenov laıyqty dep tanyldy. Sondaı-aq, «Jyldyń ádebı debıýti» atalymy boıynsha «Chernaıa krov Kazahstana. Neftıanaıa ıstorııa nezavısımostı» kitabynyń avtory Oleg Chervınskıı marapattalsa, oqyrman tańdaýy boıynsha úzdik kitapqa arnalǵan «Kitap laık» atalymyna Zıra Naýryzbaevanyń «Chetyre oblaka» kitaby, «Jyldyń úzdik metsenaty» syılyǵyna kásipker Baýyrjan Ospanov laıyq dep tanyldy. Sonymen qatar, saıasattanýshy Erlan Qarınniń amerıkalyq sarapshy Djeıkob Zennmen birlesip jazǵan «Mejdý IGIL - Al-Kaıdoı: Tsentralnoazıatskıe boevıkı v sırıskoı voıne» kitaby «Áleýmettik mánge ıe taqyrypqa arnalǵan úzdik kitap» atalymy boıynsha oqyrman úshin mańyzdy kitap dep ataldy.
Ádebı syılyqqa «Oskar» músinshelerin múgedek balalar ázirlegen.
«Jeńimpazdarǵa tapsyrylǵan músinsheler «Eldanı» qaıyrymdylyq qorynyń «Sándik qoldanbaly óner sheberhanasynda» jasalǵan. Bul sheberhanada 1-shi, 2-shi toptaǵy múgedek 15 sheber jumys atqarady. Atalǵan qor balalardy ońaltýmen aınalysady. Balalardyń qolynan shyqqan buıymdarǵa 2009 jyly eń birinshi tapsyrys bergenimde olar qatty qýanǵan bolatyn. Balalarmen taǵy da áriptes bolǵanymyzǵa qýanyshtymyz. Olar bizdiń tapsyrysymyzben osyndaı músinshelerdi jasady», - dedi Qýat Dombaı.
Uıymdastyrý komıtetiniń múshesi Qýat Dombaıdyń aıtýynsha, ádebı «Oskar» endi jyl saıyn uıymdastyrylyp turady.
