Almatyda ádebı baıqaý jarııalandy
ALMATY. Maýsymnyń 9-y. QazAqparat /Názıra Eleýhan/ -Almatyda «Altyn qalam» ádebı baıqaýy jarııalandy. Bul týraly búgin Almatyda ótken arnaıy baspasóz máslıhatynda «Altyn qalam» jobasynyń uıymdastyrýshylary málim etti,
dep habarlaıdy QazAqparat.
«Jas jazýshylar qoldaý tappaǵandyqtan, jazǵandaryn jaryqqa shyǵara almaı otyr. Elimizde memleket tarapynan jas talanttardy anyqtap, olardyń jazǵandaryn kópshilikke taratýdyń jolǵa qoıylǵan júıesi joq. Dúken sórelerindegi qazaqsha kitaptardyń azdyǵy, sonymen qatar, jas qalamgerler shyǵarmashylyǵyna jaǵdaıdyń jasalmaýy, sheteldik avtorlar jazǵan qyzyqty týyndylardyń qazaq tiline kásibı deńgeıde aýdarylmaýy qazaq jastarynyń rýhanı suranysyn ana tilinde qanaǵattandyra almaýyna sebep bolyp otyr. Sondyqtan da, qazaq jastary qalaǵan kitabyn oqyp, qajetin óteý úshin ózge tildi meńgerýge májbúr. Biz osyndaı jaǵdaıda, aıtylǵan túıtkilderdiń oń sheshilýine jeke úlesimizdi qosý úshin daryndy qalamgerlerdi qoldaıtyn bul ádebı jobany qolǵa alyp otyrmyz. Bul bastama - qazaq ádebıetinde jańa esimderdiń tanylýyna, shyǵarmalarynyń jaryq kórýine, elimizdegi ádebı álemniń keń qanat jaıýyna septigin tıgizetinine senimdimiz», dedi «Altyn qalam» ádebı jobanyń uıymdastyrýshysy Dosym Satbaev.
Atalmysh joba uıymdastyrýshylarynyń biri Erbol Jumaǵulovtyń aıtýynsha, bul syılyq Qazaqstanda nemese shetelderde turatyn, qazaq tilinde jazatyn talantty qalamgerlerdi anyqtaýǵa, olardyń eńbekterin jaryqqa shyǵarýǵa yqpal etedi.
«Avtorlarǵa qarjylaı syılyq taǵaıyndaý jáne úzdik shyǵarmalardy marapattaý rásimi ústimizdegi jyldyń qazan aıynda ótedi. Táýelsiz komıssııa úzdik avtor men úzdik týyndylardy ashyq konkýrs arqyly 2010 jyldyń maýsym jáne qyrkúıek aılary aralyǵynda «Jyldyń úzdik prozasy», «Jyldyń úzdik poezııasy», «Jyldyń úzdik ǵylymı basylymy», «Jyldyń úzdik isker basylymy», «Jyldyń úzdik balalar kitaby», «Blogomanııa» («E-Kitap»), «Úzdik ádebı aýdarma», «Jyldyń úzdik polıgrafııasy», «Qazaqstan ádebıeti salasyndaǵy jetistigi úshin» atalymdary boıynsha anyqtaıtyn bolady. Ótinishter men shyǵarmalar «www.arzu.kz» aqparatty portalynda qabyldanady. Baıqaýǵa qatysý tegin, sondaı-aq nıet bildirgen kez kelgen avtor bul báıgede baq synaı alady», deıdi uıymdastyrýshylar.
