Almatyda «adasqan» stýdent týraly dinı qoıylym kórsetildi

ALMATY. QazAqparat - Almatyda jat dinı aǵymǵa shyrmalǵan stýdenttiń ómiri baıandalǵan qoıylym kórsetilip jatyr. «Óner qyrandary» teatry sahnalaǵan jastar taqyrybyndaǵy «Zaman-aı 2» spektakli 24-25 qazan kúnderi qoıylady, ony 7,5 myń stýdent tamashalaıdy dep josparlanǵan, dep habarlaıdy QazAqparat tilshisi.

Ó. Joldasbekov atyndaǵy stýdentter saraıynda eki kún qatarynan, 24-25 qazan kúnderi  7,5 myńǵa jýyq stýdent qamtylǵan aýdıtorııaǵa dinı teris aǵym týraly qoıylym kórsetilip jatyr. Sharany «Rýhanı jańǵyrý» baǵdarlamasy aıasynda Almaty qalasy Din isteri jónindegi basqarmasynyń qoldaýymen «Óner qyrandary» teatry ótkizip jatyr.

 Sahnalandyrylǵan qoılym jastar arasynda dinı teris aǵym ıdeıalarynyń taralmaýyna arnalǵan. «Zaman-aı 2» qoıylymyn kórýge megapolıstegi joǵarǵy oqý oryndary, kolledj stýdentteri, dinı medreseler, «Nur Múbárák» dinı oqý orny shákirtteri shaqyrylǵan.

«Biz eki kúnde 7,5 myńǵa jýyq jastarǵa qoıylymdy kórsetemiz dep otyrmyz. 24 qazan kúni 3 qoıylym, 25 qazanda 2 qoıylym qoıylady. «Zaman-aı» qoıylymy byltyr da ótken. Jurt jaqsy qabyldaǵandyqtan bıyl da uıymdastyryp otyrmyz. Destrýktıvti jat dinı aǵymdardyń yqpalyna túsýdiń aldyn alý - negizgi maqsatymyz»,  - dedi Almaty qalasy Din isteri jónindegi basqarmanyń Dinı birlestiktermen jumys jónindegi bólim basshysy Erǵalı Kóshekeı.

Erlan Kóshekeıdiń aıtýynsha, qoıylym arqyly jastar arasyndaǵy teris dinı aǵymnyń aldyn alýǵa bolady.

«Sahnada destrýktıvti jat dinı aǵymǵa shyrmalǵan jas adamnyń taǵdyry kórsetilgen. Jat dinı aǵymǵa erip ketkender dástúrimizdi teriske shyǵarady, sýret salý - haram, ata-babamyzdyń joly durys emes, mýzyka tyńdaý - haram deıdi.Osyny jastarǵa túsindirý qajet», - dedi ol. 

«Zaman-aı 2» sahnalanǵan qoıylymynda sheteldik teleserıaldardyń bala tárbıesine teris yqpaly men áleýmettik jeliler taqyryby da qamtylǵan. 

Qoıylymdy tamashalaǵan Erke esimdi stýdent jastar arasynda ondaı jastardyń bar ekenin aıtty.

«Qoǵamda teris aǵymǵa shyrmalǵandar bar ekeni jasyryn emes. Men ózim Esik qalasynda turamyn. Men jol-jónekeı saqal ósirip alǵan jastardy kóp kóremin. Biraq olarmen ózim sóılesken emespin. Búgingi qoıylymda sol máseleni jaqsy kórsetti», - dedi stýdent.

Jastar dinı bilimdi ınternetten izdemeý qajet dep esepteıtinin aıtty.

Aıta keteıik, Qazaqstan boıynsha sottyń sheshimimen «ekstermıstik» dep tanylǵan 21 uıym bar.