Almatyda adamdy óltirip, bólshektegen qylmyskerlerge úkim shyqty
ALMATY. QazAqparat - Almatyda er adamdy óltirip, denesin bólshektegen aıyptalýshylarǵa sot úkimi shyqty, dep habarlaıdy «QazAqparat» HAA tilshisi.
Búgin qylmystyq ister jónindegi mamandandyrylǵan aýdanaralyq sotynda Roman Sıtakty óltirip, bólshektep tastaǵan kúdiktilerge jazalar taǵaıyndaldy.
Sotta Taıyr Ábildınov pen Azamat Qabdenovtiń isteri qaraldy. Olar Qazaqstan Respýblıkasy Qylmystyq kodeksiniń 99-babynyń 2-bólimi 7-tarmaǵynda, 188-babynyń 2-bólimi 1-tarmaǵynda jáne 384-babynyń 3-bóliminde kórsetilgen (birneshe tulǵalardyń birigip adam óltirýi, urlyq jasaýy, qujattardy zańsyz ıelenýi nemese jasyrýy) qylmystardy jasaýda aıyptaldy.
Іs materıaldary boıynsha, sottalýshylar Roman Sıtakpen birge páter jaldap turǵan jáne aradaǵy daý-damaı Play Station prıstavkasy úshin týyndaǵan.
Taıyr Ábildınovke 16,5 jylǵa bas bostandyǵynan aıyrý jáne múlkin tárkileý túrindegi jaza taǵaıyndaldy. Ol úkimdi qatań rejimdegi túzeý kolonııasynda oryndaıtyn bolady.
Azamat Qabdenov qatań rejimdegi túzeý kolonııasyna 15,5 jylǵa attandyryldy, sondaı-aq onyń múlki tárkilenetin bolady.
Eske sala ketsek, ótken jyly qyrkúıekte Raıymbek batyr jáne Abylaıhan kósheleriniń qıylysynda ornalasqan turǵyn úıdiń qoqys jáshiginen adamnyń bólshektengen dene músheleri tabyldy. Kúdiktiler birneshe kún ótken soń Baıqońyrda ustaldy.
