Almatyda adamdardy zańsyz áketý jáne saýdalaýmen kúresetin arnaıy komıssııa quryldy
ALMATY. Qazannyń 12-si. QazAqparat /Názıra Eleýhan/ -Almatyda qala ákimdigi janynan adamdardy zańsyz áketýmen, ákelýmen jáne saýdalaýmen kúresý jónindegi qalalyq komıssııa quryldy. Bul týraly búgin Almatyda ótken qalalyq máslıhattyń ІV shaqyrylymynyń HHHІ sessııasy barysynda belgili boldy.
Konsýltatıvtik-keńesshi organnyń derbes quramyna qala ákimdiginiń memlekettik-quqyqtyq bóliminiń bas mamany, Іshki saıasat basqarmasynyń, Ádilet departamentiniń, Іshki ister departamentiniń, qalalyq jumyspen qamtý jáne áleýmettik baǵdarlamalar basqarmasynyń basshylary, sonymen qatar, Qazaqstandaǵy "Daǵdarys ortalyqtarynyń Odaǵy" zańdy tulǵalar birlestiginiń basshysy engen. Komıssııa tóraǵalyǵyna - qala ákiminiń birinshi orynbasary Máýlen Muqashev saılandy.
Almaty qalasy ákimdiginiń memlekettik-quqyqtyq bóliminiń bas mamany Erǵazy Asanovtyń aıtýynsha, endi adamdardy zańsyz áketýdi, ákelýdi jáne saýdalaýdy boldyrmaý jolyn kesý boıynsha arnaıy Ereje bekitilmek. "Qurylǵan komıssııa osy másele boıynsha qaladaǵy ahýaldy taldap, usynystar ázirlep, mundaı qylmystardyń aldyn-alý boıynsha tıimdi sharalardy uıymdastyrýdy qolǵa alatyn bolady. Bolashaqta onyń quramyna qoǵamdyq uıymdardyń ókilderi de kiretin bolady", - dedi ol.
