Almatyda adam urlaǵan qylmyskerler qolǵa tústi
ALMATY. Aqpannyń 23-i. QazAqparat /Erbol Azanbek / - Almatylyq 32 jasar azamatty urlap, týystarynan aqsha bopsalaǵan qylmystyq top qolǵa tústi,
dep habarlaıdy QazAqparat.
Polıtsııa qyzmetkerleriniń aıtýynsha, jábirlenýshi urlyqty uıymdastyrýshyǵa 1 myń dollar qaryz bolǵan. Al qaryz berýshi aqshasyn qylmystyq toptaǵy dostarynyń kómegimen qaıtarýdy uıǵarǵan.
«Qaryz berýshi jaldaǵan 2 qylmysker jábirlenýshini urlap, jalǵa alynǵan páterge alyp barǵan. Kúsh qoldaný arqyly týystarymen habarlasyp, 2 myń dollar ákelýdi talap etken. Jábirlenýshiniń týystary polıtsııaǵa habarlasyp, nátıjesinde qylmyskerler quryqtaldy», deıdi qalalyq ІІD-niń uıymdasqan qylmyspen kúres basqarmasynyń bastyǵy Valerıı Kozlov.Onyń aıtýynsha, qylmyskerler «Arlan» qyzmeti men uıymdasqan qylmyspen kúres basqarmasynyń qyzmetkerleriniń birlesken sharasy nátıjesinde qolǵa túsken. Ustalý kezinde olardan gaz tapanshasy, basqa da sýyq qarýlar alynǵan. Qazir ustalǵandar men qylmysqa tapsyrys berýshiniń ústinen qylmystyq is qozǵaldy.
Esterińizge sala keteıik, Almatyda jyl basynan beri dál osyndaı 3 qylmys jasalynyp, olardyń izi sýymaı ashylǵan bolatyn.
