Almatyda adam tasymaldaýmen aınalysqan qoqys tasıtyn kólik júrgizýshisi ustaldy
ALMATY. QazAqparat – Almatyda zańsyz jolaýshylar tasymalymen aınalysqan qoqys kóliginiń júrgizýshisi ustaldy, dep habarlaıdy QazAqparat tilshisi.
Polıtsııanyń málimetinshe, qoqys tasıtyn kóliktiń júrgizýshisi 1969 jyly týǵan Ý. esimdi azamat búgin tańerteń № 4 blokpostta ustaldy.
«Tártip saqshylary onyń kóligin tekserdi. Nátıjıesinde kabınanyń ishinde tyǵylyp otyrǵan adamdardy anyqtady. Jalpy júrgizýshini qosa alǵanda júk kóliginde bes adam boldy, olardyń ekeýi – áıel. Júrgizýshi qoqys tasıtyn kóligimen jolaýshylardy oblystan qalaǵa kirgizbek bolǵan», – dep habarlaıdy qalalyq PD baspasóz qyzmeti.
Qazirgi ýaqytta júrgizýshi men jolaýshylar Alataý aýdandyq polıtsııa basqarmasyna jetkizildi. Olar QR Ákimshilik quqyq buzýshylyq týraly kodeksiniń 476-babynyń talaptaryna sáıkes tótenshe jaǵdaıdy buzǵany úshin ákimshilik jaýapkershilikke tartyldy. Sheshim úshin óndiris materıaldary sotqa jiberiledi.
