Almatyda adam ómirine qaýip tóndiretin 1700 lıfti bar
ALMATY. QazAqparat - Almatyda 3700 turǵyn úıdiń keminde jartysynyń lıftileri aýystyrýdy qajet etedi. Bul týraly búgin Óńirlik kommýnıkatsııalar qyzmetinde qalalyq Turǵyn úı ınspektsııasy basqarmasynyń basshysy Ánýar Óskenbaev aıtty, dep habarlaıdy QazAqparat tilshisi.
Mamandardyń aıtýynsha, tozǵan jedelsatylar turǵyndardyń ómirine qaýip týǵyzyp otyr.
Qala bıligi bul máseleniń qalaı sheshilip jatqanyn aıtyp berdi.
«Jalpy alǵanda, Almaty qalasynyń turǵyn úı qorynda shamamen 3500 lıfti bar. Onyń ishinde 25 jyldan beri aýystyrylmaǵan lıftiler de jeterlik. Búginde 1700 lıft (45%) aýystyrýdy talap etedi. Osy ýaqytqa deıin 166 úıde 375 lıfti aýystyryldy, Oǵan 1 mlrd 930 mln teńge qarjy jumsaldy. Byltyr 94 úıde 199 elevator aýystyryldy. Budan basqa bıyl 1 mlrd 443 mln teńgege 105 úıdegi 222 lıfti aýystyrylady. Bul jumystardy bıyl 15 tamyzda aıaqtaý josparlanǵan», - dedi Ánýar Óskenbaev.
Bólim basshysynyń aıtýynsha, 2020 jylǵa deıin óńirlerdi damytý baǵdarlamasynyń aıasynda «Almaty turǵyny» JShS kóppáterli turǵyn úılerdi jóndeýden ótkizedi.
«Osy ýaqytqa deıin jospardaǵy 539 turǵyn úıdi jóndeýge 5 mlrd 252 mln teńge jumsaldy. 284 úıde kúrdeli jóndeý júrgizildi. Eskirgen lıft qondyrǵylarynyń ornyna 88 úıde jylý almastyrǵyshtar ornatyldy», - dedi Ánýar Óskenbaev.
