Almatyda adam óltirgen ózbekstandyq azamat ustaldy
ALMATY. Qazannyń 5-i. QazAqparat /Erbol Azanbek/ - Almatyda jergilikti turǵyndy óltirgen 37 jasar Ózbekstan azamaty ustaldy,
dep habarlaıdy qalalyq ІІD-niń baspasóz qyzmeti.
Qylmys Túrksib aýdanynda ornalasqan ıesiz tsehtyń ishinde oryn alǵan. «Qazaqstandyq azamat úı-jaıy bola tura kezbelik ómir súrgen. Qylmys oryn alǵan kúni ıesiz tsehtyń ishinde qonýǵa qalyp, sondaǵy qańǵybastarmen birigip spırttik ishimdik ishken. Nátıjesinde ózbekstandyq azamatpen janjal týyp, arty kisi ólimine soqtyrǵan», deıdi Túrksib aýdandyq ІІB-i bastyǵynyń orynbasary, polkovnık Parhat Madalıev.
Ózbekstandyq «qonaq» onyń denesin japyraqtarmen jaýyp tastap ketken. Tek 2 kún ótken soń jergilikti turǵyndar ólikti taýyp alǵan. «Qylmysker Almaty oblysynyń Jambyl aýdanynyń ortalyǵy Uzynaǵashtan tabyldy. Ol sonda qurylys alańdarynyń birinde jumys isteıtin jerlesiniń qasynda boı tasalap júrgen. Sondaı-aq onyń jaqyn kúnderi óz otanyna ketý jospary bolǵan. Qazir tekserý-tergeý jumystary júrgizilýde», deıdi P.Madalıev.
