Almatyda adam óliminen soń eki medıtsınalyq mekeme tekserilýde
ALMATY. QazAqparat - Almaty qalalyq Qoǵamdyq densaýlyqty qorǵaý departamenti Erbol Kósherbaevtyń óliminen soń eki medıtsınalyq mekemeni tekserýdi qolǵa aldy, dep habarlaıdy QazAqparat tilshisi.
Qaıǵyly oqıǵa 7 qyrkúıekte № 7 qalalyq aýrýhanada bolǵan. 50-ler shamasyndaǵy Erbol Kósherbaev baýyr tsırrozy dıagnozynan atalǵan aýrýhananyń jansaqtaý bóliminde kóz jumǵan.
Marqumnyń týysqandary er adamnyń densaýlyǵyna dárigerler salǵyrt qarady dep aıyptap otyr. Bul týraly onyń qaryndasy Altynaı Júsinova áleýmettik jelidegi paraqshasynda jazdy.
Ol atalǵan jazbasyn QR DSM jáne basqa da organdarǵa shaǵym retinde jazǵan. Onyń aıtýynsha, aǵasy 3 qyrkúıekten bastap aýyrǵan. 3-inen 6-syna deıingi aralyqta olar birneshe ret úıge dáriger shaqyrtqan. Alaıda jedel járdem feldsherleri de, jergilikti emhananyń terapevti de úıge dári jazyp bergen.
«Al aǵamdy emdeý úshin portalǵa tirkeý kerek dedi. Portaldaǵy kezek qazannyń aıaǵyna biraq ketedi eken. Aýyryp turǵan adam qazan aıynyń aıaǵyn qalaı kútedi? Juma kúni feldsher shuǵyl túrde aǵamdy aýrýhanaǵa alyp ketti. Keshki 16:00 kezinde aǵamnyń taldaýlary óte nashar bolǵandyqtan, jansaqtaý bólimine jatqyzdy. Tańǵy saǵat 7-ler shamasynda aǵamnan aıryldyq», - dedi ol.
Onyń aıtýynsha, marqum ókpesine sý jınalǵandyqtan, búırek pen baýyr jetkiliksizdiginen, sepsısten kóz jumǵan. Sonymen qatar, marqumnyń jaqyndary múrdeni alyp ketý úshin de birqatar áýre-sarsańǵa túsken.
Atap aıtqanda, máıithana qyzmetkerleri múrdeni «úıde qaıtys boldy» dep jazǵanda ǵana ýaqytynda beretinderin aıtqan. №16 emhana er adamnyń týystaryna «úıde qaıtys boldy» degen anyqtama jazyp bergen.
«Ol jansaqtaý bóliminde qaıtys bolsa, qalaısha úıde óldi degen qaǵaz beredi? QR Densaýlyq saqtaý mınıstrligine de, №7 aýrýhana men №16 emhana basshylyǵyna da suraǵym kóp», - dedi Altynaı Júnisova.
Atalǵan derekke baılanysty qalalyq Qoǵamdyq densaýlyqty saqtaý basqarmasy 2 medıtsınalyq uıymdy tekserýdi bastady.
«Erbol Kósherbaevqa sapasyz medıtsınalyq qyzmet kórsetti» degen sebeppen qalalyq jedel járdem stansasy men № 7 qalalyq aýrýhananyń qyzmeti tekserilip jatyr. Qorytyndysy keıinirek shyǵarylady», - dedi departamentten.
