Almatyda adaldyqqa shaqyratyn mýral paıda boldy

ALMATY. QazAqparat - Almatyda «Almaty – Adaldyq alańy» jobasy aıasynda ál-Farabı dańǵylynda «Óz elińdi buzba» atty úlken sýret salynyp bitti, dep habarlaıdy QazAqparat tilshisi.

Alyp kartına Meńdiqulov pen Dostyq kósheleriniń arasynda Ál-farabı dańǵylynda ornalasqan úılerdiń biriniń qabyrǵasyna salyndy. Sýrette para alǵan qyzmetkerdiń ustalyp jatqany beınelengen.

QR Sybaılas jemqorlyqqa qarsy qyzmetiniń habarlaýynsha, bul týyndy halyq arasynda adaldyq, ádildik qasıetterdi nasıhattaýǵa baǵyttalǵan.

«Halyq arasynda adal ári ádil urpaq tárbıeleý, halyqpen osy baǵytta keri baılanys ornatý mańyzdy. Azamattardyń únine qulaq asyp, olardyń muń-muqtajyn tyńdaý bilýimiz kerek», - dedi sybaılas jemqorlyqqa qarsy qyzmettiń tóraǵasy Alık Shpekbaev ashylý saltanatynda.

«Mundaı mádenı nysandar halyq sanasyn ózgertýge, sybaılas jemqorlyqqa qarsy mádenıetti qalyptastyrýǵa serpin beredi», - dedi qalalyq Sybaılas jemqorlyqqa qarsy vedomstvo basshysy Nyǵmedjan Saparov.

Joba avtorlary sybaılas jemqorlyqqa qarsy kúreste elimizdiń ár azamatynyń qosar úlesi mol ekenin aıtty.