Almatyda «Abylaı han murasy: ıdeıalardyń ózara baılanysy jáne sabaqtastyǵy» atty halyqaralyq ǵylymı-praktıkalyq konferentsııa ótedi
ASTANA. 7 jeltoqsan. QazAqparat - Abylaı han atyndaǵy Qazaq halyqaralyq qatynastar jáne álem tilderi ýnıversıteti 2013 jyldyń 10 jeltoqsanynda Abylaı hannyń 300 jyldyǵyna arnalǵan «Abylaı han murasy: ıdeıalardyń ózara baılanysy jáne sabaqtastyǵy» atty halyqaralyq ǵylymı-praktıkalyq konferentsııa ótkizedi.
Bul týraly atalǵan joǵary oqý ornynyń baspasóz qyzmeti habarlady.
«2013 jyly kórnekti mádenıet, memleket jáne qoǵam qaıratkerleriniń mereıtoılaryn daıyndaý jáne ótkizý týraly» Qazaqstan Respýblıkasy Úkimetiniń 2013 jylǵy 5 maýsymdaǵy № 573 Qaýlysy negizinde 2013 jyl Abylaı hannyń 300 jyldyǵyna arnalǵan. Jyl boıy elimizde osy mereıtoıǵa arnalǵan birneshe sharalar uıymdastyryldy.
Abylaı han murasy kúni búginge deıin zerttelýde. QR Prezıdenti N.Á.Nazarbaev Qazaqstan tarıhyndaǵy Abylaı hannyń rólin erekshe ataı otyryp: « ...Biz búgin Abylaı hannyń eren eńbekterin atap ótýmen ǵana shektelmeýimiz kerek. Halqynyń aldyna, óz aldyna qandaı maqsattar qoıdy? Qandaı maqsattaryna qol jetkize aldy, ne oryndalmady, keleshek urpaqqa qandaı ósıet qaldyrdy, neni eskertti, sol kezeńdegi oqıǵalardan qandaı sabaq ala alamyz, degen suraqtarǵa jaýap izdep, tabýymyz kerek». - degen bolatyn.
Jaqynda ǵana óziniń 70 jyldyq mereıtoıyn atap ótken Ýnıversıtet, osy mereıtoı jylynda óz úlesin qosa otyryp, Abylaı han esimin zor maqtanyshpen alyp júredi. Barlyq qurlyqta halyqaralyq ımıdjdi qalyptastyrýda ýnıversıtette kóptegen jumystar júrgiziledi. Halyqaralyq yntymaqtastyqty keńeıtýge baǵyttalǵan is-áreketterdi jalǵastyra otyryp, ýnıversıtet kópvektorly saıasat negizin qalaǵan Abylaı han murasyn jalǵastyrýda qoldan kelgenshe óz úlesin qosady.
Konferentsııaǵa tanymal qazaqstandyq jáne sheteldik ǵalymdar (Frantsııa, Malaızııa, QHR, Ulybrıtanııa, Reseı jáne t.b.), sonymen qatar Qazaqstan Respýblıkasy resmı organdary men ǵylymı-pedagogıkalyq qaýymdastyq ókilderi qatysady.
