Almatyda Ábilıazovtyń sybaılastary ustaldy
ASTANA. QazAqparat - Almatyda Sybaılas jemqorlyqqa qarsy is-qımyl ulttyq bıýrosynyń vedomstvoaralyq jedel tergeý toby men Ulttyq qaýipsizdik komıtetiniń ókilderi bankır Muhtar Ábilıazovtyń sybaılastary bolýy múmkin dep kúdik keltirilip otyrǵan 4 adamdy ustady. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Sybaılas jemqorlyqqa qarsy is-qımyl bıýrosy habarlady.
Almatyda 13 qarasha kúni Sybaılas jemqorlyqqa qarsy is-qımyl ulttyq bıýrosynyń vedomstvoaralyq jedel tergeý toby men Ulttyq qaýipsizdik komıtetiniń ókilderi QR Qylmystyq Kodeksiniń 189-shy (urlaý) jáne 193-shi (zańdastyrý) babymen qarastyrylǵan qylmystyq áreketterdi jasady degen kúdikpen I.Erimbetov, V.Sokolenko, D.Pestov pen M.Zorov atty azamattardy ustady.
Atalǵan azamattar men olar basqaratyn kompanııalardyń Ábilıazovtyń bankten urlaǵan 50 mln dollardan astam qarjysyn zańdastyrý isine qatysy bolýy múmkin degen kúdikpen sotqa deıingi tergeý sharalary bastaldy.
Tergeýshiler sondaı-aq I.Erimbetovke óziniń baqylaýyndaǵy «SKY SERVISE» JShS-sy arqyly 1 mlrd teńgege jýyq bıýdjet qarjysyn jymqyrdy degen kúdik keltirip otyr. Sondaı-aq Erimbetov pen onyń sybaılastary qazaqstandyq quqyq qorǵaý organynyń ókilderinen qashyp, shetelde boı tasalap júrgen azamattardyń múddesi úshin birlesip áreket etken.
Olardyń biri osy kezde Belgııada júrgen Erimbetovtyń týǵan ápkesi - Botagóz Djardemalı. Ol Muhtar Ábilıazovtyń keńesshisi jáne qoldaýshysy. Djardemalıdiń «BTA bank» tarapynan 500 mln AQSh dollary kólemindegi qaıtarymsyz nesıe berý isine tikeleı qatysy bar. 2013 jyly oǵan QR Qylmystyq kodeksiniń 28, 176 jáne 220 baptarynda qarastyrylǵan qylmystyq áreketterdi (senip tapsyrylǵan múlikti uıymdasqan qylmystyq toptyń kómegimen iri kólemde ıemdenip alý nemese talan-tarajǵa salý) iske asyrdy degen aıyp taǵylyp, halyqaralyq izdeý jarııalanǵan bolatyn.
QR QPK-niń 128 baby boıynsha Erimbetov, Pestov, Sokolenko jáne Zorov Almaty qalalyq Іshki ister departamentiniń tergeý ızolıatoryna qamaldy. Sot olardy qamaýǵa alýǵa jáne múlikterine toqtam salýǵa sanktsııa berdi.
«Tergeý qyzmeti Erimbetov, Pestov, Sokolenko men Zorovtyń bilikti qorǵaý sharalarymen qamtamasyz etilip, qamaýda bolý talaptarynyń tolyq saqtalǵandyǵyn resmı túrde jarııa etti. Protsessýaldyq normalardy buzý jóninde shaǵymdar kúdiktilerden de olardyń qorǵaýshylarynan da túsken joq. Olarǵa eshqandaı qysym kórsetilgen joq jáne olar tergeý jumystaryna belsendi kómek kórsetýde»,-delingen habarlamada.
«Jalpy qashqyn qylmyskerler M.Ábilıazov pen B.Djardemalıdiń týǵan-týystary men kúdiktilerdi jáne ózderine baǵynyshty azamattardy paıdalaný arqyly tergeý sharalaryn ádeıi burmalaýy, ony saıasılandyrýǵa degen talpynysy olardyń jaýapkershilikten jaltarýǵa degen kezekti umtylysy bolyp tabylady»,-deıdi Ulttyq bıýro ókilderi.
