Almatyda Ábilahat Esbaevtyń dástúrli án keshi ótti
ALMATY. Naýryzdyń 29-y. QazAqparat /Erlik Erjanuly/ - Almatydaǵy mektepterdiń birine ustazdarǵa ánmen máńgilik eskertkish turǵyzǵan Ábilahat Esbaevtyń esimin berý kerek. Bul týraly senbi kúni Respýblıka saraıynda ótken Ábilahat Esbaevtyń án keshinde aıtyldy,
dep habarlaıdy QazAqparat.
Kontsertte Nurǵalı Núsipjanov «Tobyldy tolqytyp», «Shildehana jyryn» aıtyp, Murat Toqashbaev «Týǵan jerdi» saǵyntty. «Batyr bala Bolatbek» (Áıgerim Qalaýbaeva), «Jeńeshege» (Dana Mahanbaeva), «Boıdaq bolyp júrmin áli» (Asqar Júnisbekov) dep syr aqtardy. Tańat Mamyrhanuly «Saǵynysh eken bala kez», Tamara Asar «Áli esimde» dep «Jaıyq qyzy» (Sulýshash Nurmaǵambetova) men «Marjan qyzdyń» (Jubanysh Jeksenuly), «Oramalyn» (Ádil Slamhan) eske túsirdi.
«Bul sharany biz 2005 jyldan beri ótkizip kele jatyrmyz. Ábilahat Esbaevtyń 85 jyldyǵyna arnalǵan án keshi kúzde Astanada ótetin bolady. Oǵan deıin áıgili sazgerdiń án jınaqtary men estelikter kitaby shyǵarylady. Biz Almatydaǵy mektepterdiń birine Ábilahat Ysmaǵululynyń esimin berý taraly qalanyń qazirgi ákimine de, burynǵy ákimine de arnaıy hat joldaǵanbyz. Ol júzege asqansha áli de jazyp, aıta beretin bolamyz. «Ustazym meniń ustazym» dep ustazdarǵa máńgi ólmes án jazǵan adamǵa mekteptiń atyn bermegende kimge beremiz», deıdi Shámshi Qaldaıaqov atyndaǵy halyqaralyq án festıvali dırektsııasynyń dırektory Qaldybek Qurmanáli.
Ábilahat Ysmaǵululy 1925 jyly qarashanyń 21-inde Qostanaı oblysynyń Amangeldi aýdanynda №2 aýylda dúnıege kelip, 1976 jyly mamyrdyń 10-ynda Almatyda 51 jasynda dúnıeden ozǵan bolatyn. Ustazy A.Sapaqovtyń óleńine jazylǵan «Týǵan el» dep atalatyn eń alǵashqy týyndysyn 1942 jyly 17 jasynda ómirge ákelgen sazger negizinen án janryndaǵy shyǵarmalardy ómirge ákeldi. Sondaı-aq S. Adambekovtiń «Kún men kóleńke» Á. Tájibaevtyń «Toı bolaryna», Q. Amanjolovtyń «Dosymnyń úılenýi» spektaklderine, I. Baızaqovtyń poemasy boıynsha qoıylǵan radıoqoıylymǵa mýzyka jazdy.
