Almatyda Ábdýálı Qaıdardyń 85 jyldyǵyna arnalǵan halyqaralyq ǵylymı-teorııalyq konferentsııa ótip jatyr
ALMATY. Jeltoqsannyń 11-i. QazAqparat /Názıra Eleýhan/ - Almatyda Uly Otan soǵysynyń ardageri, fılologııa ǵylymdarynyń doktory, akademık Ábdýálı Qaıdardyń 85 jasqa tolýyna arnalǵan «Etnos jáne til» dep atalatyn halyqaralyq ǵylymı-teorııalyq konferentsııa ótip jatyr,
dep habarlaıdy QazAqparat.
Atalmysh konferentsııany QR Bilim jáne ǵylym mınıstrliginiń Ǵylym komıteti men A.Baıtursynuly atyndaǵy Til bilimi ınstıtýty, Abaı atyndaǵy QazUPÝ birigip uıymdastyryp otyr. Ǵylymı máslıhat til bilimine úlken eńbek sińirgen ǵalym Ábdýálı Qaıdardy Qyrǵyz, Qytaı, Túrik elderiniń Ulttyq ǵylym akademııalary akademıkteriniń, sondaı-aq qazaqstandyq ǵalymdar men jazýshylardyń, til bilimi ınstıtýty basshylarynyń quttyqtaýmen bastaldy.
Konferentsııa barysynda qazirgi qazaq tiliniń ózekti máseleleri sóz etilip, qazaq etnosynyń turaqty damýynyń eń senimdi ári qudyretti kúshterine qazaq tiliniń halyq danalyǵy, ulttyq salt-dástúr men mádenıetti urpaqtan-urpaqqa jetkizetin muragerlik qyzmettiń jatatyndyǵy aıtyldy. Ulttyq til ulttyń ózin tanyp bilýdiń birden-bir quraly, halyqtardy birlestirýdiń, eldikti saqtaýdyń, memleketti damytýdyń alǵysharty ekendigi týraly oı qozǵaldy.
Ábdýálı Týǵanbaıuly QaıdarAbaı atyndaǵy Qazaq ulttyq pedagogıkalyq ýnıversıtetinde qazaq tili biliminiń kórnekti mamany, belgili túrkitanýshy, QR Ulttyq ǵylym akademııasynyń akademıgi, Qazaq SSR-niń eńbek sińirgen ǵylym qaıratkeri, Sh.Ýálıhanov atyndaǵy І dárejeli syılyqtyń ıegeri, Túrkııanyń «Dil Kurumu» lıngvıstıkalyq qoǵamynyń qurmetti múshesi, Bashqurtstan Ulttyq ǵylym akademııasynyń qurmetti akademıgi, Halyqaralyq «Qazaq tili» qoǵamynyń qurmetti prezıdenti, fılologııa ǵylymdarynyń doktory, professor.
