Almatyda Ábdýálı Qaıdardy aqtyq saparǵa shyǵaryp saldy
ALMATY. QazAqparat - Almaty jurtshylyǵy Ǵylym ordasynda Qazaqstan Ulttyq ǵylym akademııasynyń akademıgi, qazaq til biliminiń kórnekti mamany, belgili túrkitanýshy Ábdýálı Qaıdardy aqtyq saparǵa shyǵaryp salýǵa jınaldy, dep habarlaıdy QazAqparat tilshisi.
Qaraly jıynǵa zııaly qaýym ókilderi, ǵalymnyń əriptesteri qatysty.
Qazaqstan Ulttyq ǵylym akademııasynyń akademıgi, qazaq til biliminiń kórnekti mamany, belgili túrkitanýshy Ábdýálı Týǵanbaıuly Qaıdar 95 jasqa qaraǵan shaǵynda qaıtys bolǵan edi.
Akademık Ábdýálı Qaıdar qazaq halqynyń til biliminiń damýyna zor úles qosqan aıtýly tulǵa. Ol sanaly ǵumyrynyń basym bóligin til bilimi salasyn damytýǵa, ǵalymdar daıarlaýǵa arnady. Ábdýálı Qaıdar Táýelsizdiktiń alǵashqy jyldarynan bastap qazaq tiliniń mártebesi úshin qyzmet etip, Halyqaralyq «Qazaq tili» qoǵamynyń prezıdenti boldy.
Táýelsizdiktiń alǵashqy jyldarynda-aq latyn álipbıine kóshý máselesin tuńǵysh kóterip, Elbasyna hat joldady. Keıinnen, osydan dál 15 jyl buryn akademık Ábdýálı Qaıdardyń daıyndaǵan nusqasynda «QazAqparat» HAA agenttigi qazaq tilindegi habarlaryn latyn álipbıimen taratýdy qolǵa alǵan edi. 
