Almatyda Ábdijámil Nurpeıisovtiń shyǵarmashylyq keshi ótedi
ASTANA. Sáýirdiń 27-si. QazAqparat - Sáýirdiń 29-ynda Abaı atyndaǵy opera jáne balet teatrynda Qazaqstannyń halyq jazýshysy, KSRO Memlekettik syılyǵynyń laýreaty Ábdijámil Nurpeıisovtiń «Ábe dostaryn shaqyrady» atty shyǵarmashylyq keshi ótedi. Keshte Reseıdiń Máskeý qalasynda 15-ret jańa redaktsııamen basylyp shyqqan jazýshynyń áıgili «Qan men ter» trılogııasynyń, «Ábe» atty derekti fılm men jańa kitaptyń tusaýkeserleri bolady, dep habarlady keshti uıymdastyrý komıttinen.
Ótken XX ǵasyr qazaq ádebıetiniń altyn ǵasyry atala bastady. Onyń osylaı atalýyna mol sybaǵa qosqan sýretkerlerdiń biri Ábdijámıl Nurpeıisov ekendigine daý joq. Kózi tirisinde ataǵy jer jarǵan Ábdijámildiń «Qan men ter» trılogııasy, basqada shyǵarmalary otyz shaqty shetel tilderine aýdarylyp, ádebıetimizdi dúnıe júzine tanytty, álem ádebıetshileri qasqa-jaısańdarynyń úzdik baǵasyna ıe boldy.
Ábdijámil Kárimuly Nurpeıisov 1924 jyly qazannyń 22-sinde Qyzylorda oblysy Aral aýdanynyń Qulandy poselkesiniń Úshkóń aýylynda týǵan. 1942 jyly orta mektepti támamdasymen armııa qataryna shaqyrylǵan órimdeı jas Ábdijámıl Ońtústik jáne Prıbaltıka maıdanynda soǵysqa qatysady. Ekinshi dárejeli Uly Otan soǵysy, Qyzyl Juldyz ordenderimen marapattalady.
1946 jyly jeltoqsanda armııa qatarynan bosanǵan boıda áskerde júrgende bastaǵan «Kýrlıandııa» romanyn jazýǵa kirisedi. Ony bitirip baspaǵa jibergen soń bir jyl Qazaq memlekettik ýnıversıtetinde oqıdy. Kelesi 1954 jyly Máskeýdegi A.M.Gorkıı atyndaǵy ádebıet ınstıtýtyna túsip, ony 1956 jyly taýysady. Tyrnaqaldy kitaby úshin Jambyl atyndaǵy respýblıkalyq syılyqtyń laýreaty atanady. Proza salasynda úzbeı eńbektenýimen qatar, jas talant ótkir synymen, pýblıtsıstıkalyq maqalalarymen de kózge túsedi. 1962 jyldyń aıaǵy - 1964 jyldary Qazaqstan Jazýshylar odaǵynyń organy - «Juldyz» jýrnalynyń bas redaktory bolyp isteıdi.
1964 jyldan beri uzaq jyldar boıy biryńǵaı shyǵarmagerlik qyzmetpen shuǵyldanyp, óndire jazǵan Ábdijámıl, naryq zamanynda halyqaralyq qazaq PEN klýbyn uıymdastyryp, onyń prezıdenttigine saılandy. 2000 jyly PEN klýb janynan «Tań-Sholpan» jýrnalyn shyǵarady. Kóp jyldardan beri ol osy ádebı-kópshilik jýrnalynyń redaktorlar keńesiniń tóraǵasy.
«Qan men ter» trılogııasy, «Sońǵy paryz» dılogııasy - Nurpeıisovtiń ǵana emes, kúlli qazaq ádebıetiniń tabysy. Úlken jazýshymyzdyń eren eńbegi eliniń, memleketiniń joǵary baǵasyna ıe boldy. Jazýshy retinde keýdesine Eńbek Qyzyl Tý, «Qurmet belgisi» jáne táýelsiz Qazaqstannyń «Otan» ordenderin qadady. 1985 jyly «Qazaq KSR halyq jazýshysy» qurmetti ataǵy berildi.
Ol - SSSR Memlekettik syılyǵynyń laýreaty. Bul mártebeli syılyqty jazýshylardan Qazaqstanda úsh qalamger: Muhtar Áýezov, Ábdijámıl Nurpeıisov, Juban Moldaǵalıev qana alǵanyn eskersek, ádebıetimizdiń, ádebıet arqyly tutastaı sóz ónerine júırik qazaq halqy abyroıynyń tórtkúl dúnıe aldynda arta túskenine aldymen kimderge boryshty ekenimiz ózinen ózi aıǵaqtalady.
