Almatyda Abaı, Jubanov, Tóle bı kóshelerin uzartý jumysy qashan aıaqtalady

ALMATY. QazAqparat - Almaty qalasynyń ákimi Erbolat Dosaev Naýryzbaı aýdanynyń turǵyndarymen kezdesýinde Abaı dańǵyly, Tóle bı jáne Jubanov kóshelerin uzartý jumystary qashan aıaqtalatynyn aıtty, dep habarlaıdy QazAqparat tilshisi.

«Abaı dańǵylyn Stroıtelnaıa kóshesinen qala shekarasyna deıin (600 metr) uzartý aıasynda búgingi tańda jobalaý-smetalyq qujattamaǵa ózgerister engizilýde. Osy jyldyń sońyna deıin memlekettik saraptamanyń qorytyndysyn alý josparda. Jumystardy 2024 jyldyń sońyna deıin aıaqtaý kózdelgen»,- dedi shahar basshysy.

Aıtýynsha, Tóle bı kóshesin uzartý maqsatynda Alataý dańǵyly men Altyn Orda kóshesi arasynda uzyndyǵy 700 metr jol salý jumystary bastaldy. Ony osy jyldyń 20 qarashasyna deıin aıaqtaý kózdelgen.

«Jubanov kóshesin Momyshuly kóshesinen qala shekarasyna deıin uzartý aıasynda búgingi tańda merdiger uıymdy anyqtaý boıynsha konkýrstyq rásimder júrgizilýde (konkýrstyq rásimder osy jyldyń qazan aıynda aıaqtalady). Jumystar jer ýchaskelerin satyp alýǵa baılanysty júrgiziletin bolady, 2025 jyldyń sońyna deıin aıaqtaımyz»,- dedi E.Dosaev.