Almatyda «Abaı» murajaı-kabıneti ashylady
ALMATY. Sáýirdiń 8-i. QazAqparat /Erlik Erjanuly/ - Almatyda sáýirdiń 9-y kúni Qazaqtyń Abaı atyndaǵy ulttyq pedagogıkalyq ýnıversıtetinde «Abaı» murajaı-kabınetiniń tusaýkeseri ótedi,
dep habarlaıdy QazAqparat.
Uly Abaı esimimen atalatyn Qazaqstandaǵy eń baıyrǵy pedagogıkalyq joǵary oqý orny 1928 jyly qurylǵan bolatyn. 1935 jyldan bastap Abaı esimimen atala bastaǵan ýnıversıtette 2008 jyly «Abaıtaný» ǵylymı-zertteý ortalyǵy ashyldy. Ony belgili abaıtanýshy-ǵalym, fılologııa ǵylymdarynyń doktory, professor Mekemtas Myrzahmetov basqarady. Ótken jyly óziniń 80 jyldyq mereıtoıyn atap ótken oqý orny sońǵy jyldary uly tulǵanyń rýhanı qundylyqtaryn ǵylymı negizdep, ony nasıhattap halyqtyń ıgiligine asyrý jáne jas urpaqty tárbıeleý maqsatymen kóptegen ıgilikti ister atqarylýda. Stýdentter arasynda júıeli túrde respýblıkalyq «Abaı álemi» festıvali men «Abaıtaný» dáristerin ótkizý qolǵa alyndy. Endi jańadan ashylǵaly otyrǵan «Abaı» murajaı-kabıneti uly tulǵanyń ómiri men shyǵarmashylyq qyzmetinen ǵana málimet berip qoımaı, onyń adamzattyń Abaıy retindegi rýhanı dúnıesin tanytatyn ulaǵatty ǵylymı ortalyqqa aınalady dep josparlanyp otyr.
