Almatyda Abaı dańǵylynyń bir bóligi eki kúnge jabylady
Almaty qalasy ákimdiginiń málimetinshe, Abaı dańǵylyndaǵy jol jumystary bekitilgen kestege sáıkes júrgizilip jatyr. Qazirgi ýaqytta batys baǵytta Dostyq dańǵylynan Esentaı ózenindegi kópirge deıingi jáne shyǵys baǵytta Tilendıev kóshesinen Áýezov kóshesine deıingi aýmaqtarda jóndeý jumystary tolyq aıaqtalyp, jol ashyldy.
Kelesi ýchaske – Esentaı ózeninen Naýryzbaı batyr kóshesine deıin. 28 shilde túngi saǵat 23-00-den 30 shilde tańǵy 06-00-ge deıin dańǵyldyń soltústik betinde polımerli asfaltbeton jabynyn tóseý jumystaryna baılanysty kólik qozǵalysy tolyq shekteledi.
«Jabyq jerlerdi Sátbaev, Qurmanǵazy kósheleri arqyly aınalyp ótige bolady. Naýryzbaı batyr, Baıtursynov kósheleri men Seıfýllın dańǵyly arqyly kesip ótetin jol ashyq bolady. Ortalyq stadıonǵa kirip, shyǵatyn jol, Masanshy kóshesinen Abaı dańǵylyna soltústik baǵytta burylatyn jolda qozǵalys shekteledi. Sátbaev jáne Baıtursynov kósheleri arqyly aınalyp ótýge bolady»,- dep habarlady ákimdikten.
Jol-kólik oqıǵasynyń aldyn alý jáne jol qozǵalysyn uıymdastyrý úshin joǵaryda atalǵan kóshe ýchaskesinde patrýldik polıtsııa qyzmetkerleri jumyldyrylady.
Jóndeý júrgiziletin ýchaskeler týraly ózekti aqparatpen qala ákimdigi men qalalyq mobıldilik basqarmasynyń (@qmb_almaty) resmı paraqshalarynda, sonymen birge, 2GIS qosymshasynda tanysýǵa bolady.
Esterińizge salaıyq, Almatyda alǵash ret polımerlerdi paıdalanyp, asfalt tóseý jumystary júrgizilip jatyr. Mundaı qospalar tozýǵa tózimdi, jumsartý temperatýrasy joǵary (65-70°C), sondyqtan ystyqqa tótep berip, áldeqaıda uzaǵyraq qyzmet etedi – 8-10 jyl paıdalanýǵa bolady.
Jol jóndeý 2023 jylǵa josparlanǵan jumystar aıasynda qolǵa alynǵan.
Almaty ákimdigi ýaqytsha qolaısyzdyq úshin keshirim surap, jol júrý baǵytyn aldyn ala josparlap alýǵa keńes berdi.
