Almatyda Abaı dańǵyly eki kúnge jabylady

ALMATY. QazAqparat - Almatyda jolǵa asfalt tóselýine baılanysty Abaı dańǵyly boıynyń Tilendıev kóshesinen Rozybakıev kóshesine deıingi bóligi eki kúnge jabylady. 7 shilde saǵat 23:00-den 9 shilde saǵat 06:00-ge deıin qozǵalys tolyǵymen shekteledi, dep habarlaıdy QazAqparat.

Aınalma jol Esenjanov, Sátbaev, Tilendıev, Brýsılovskıı, Turǵut Ozal kóshelerimen qamtamasyz etiledi.

Qozǵalysty shekteý osy ýchaskede polımerasfaltbetondy qoldanýǵa baılanysty. Ol 150-160 S temperatýrada tóseledi, qajetti beriktikke jetý úshin qospany 40 gradýsqa deıin salqyndatý kerek.

Áıtpese qospanyń quramy kólik júktemesiniń áserinen buzylady, bul bolashaqta kósheniń jarylýyna ákeledi.

Jabyn tóseý jumysy túnde júrgiziledi, alaıda jumystyń sapasy nasharlamas úshin betti salqyndatý jáne tıisti qattylyq pen beriktikti jınaý úshin orta eseppen 36 saǵatqa shydaý kerek.

Bul merzim ádette, kúndizgi ýaqytqa sáıkes keledi.

«Ýaqytsha qolaısyzdyq úshin keshirim suraımyz. Qala joldaryn jóndeý - olardyń bizge uzaq qyzmet etýi úshin qajetti shara. Sondyqtan baratyn baǵytyńyzdy aldyn ala belgilep alýdy ótinemiz» dep eskertedi ákimdikten.