Almatyda A.Jubanovtyń 110 jyldyǵyna arnalǵan «Júrek pernesi» atty kórme ashyldy (FOTO)
ALMATY. QazAqparat - Almatyda Ahmet jáne Ǵazıza Jubanovtardyń memorıaldy mýzeı-páterinde qazaq kásibı mýzyka mádenıetiniń negizin qalaýshy Ahmet Jubanovtyń 110 jyldyǵyna arnalǵan «Júrek pernesi» atty kórme ashyldy.
Kórmeniń ashylý rásimine belgili mýzyka mamandary, mádenıet jáne bilim qaıratkerleri, sondaı-aq, A. Jubanovtyń shákirtteri qatysty, dep habarlaıdy QR Memlekettik ortalyq mýzeıiniń baspasóz qyzmeti.
Kórmeniń ashylý rásimi barysynda Ahmet Jubanov atyndaǵy Respýblıkalyq mamandandyrylǵan mýzykalyq orta mektep-ınternaty oqýshylary Ahmet Jubanov pen Ǵazıza Jubanovanyń birqatar tanymal shyǵarmalaryn oryndady.
Al «Júrek pernesi» kórmesinde Ahmet Qýanuly Jubanovtyń ómirlik, shyǵarmashylyq, ǵylymı jáne pedagogıkalyq jolyn ashyp kórsetetin ekspozıtsııalar, sondaı-aq jańadan basylyp shyqqan mýzykalyq shyǵarmalary, partıtýralary, kitaptary (kontsert baǵdarlamalary, hattar men qoljazbalar) usynyldy.
Aıta ketelik, Qazaq KSR halyq ártisi, professor, ónertaný ǵylymynyń doktory, Qazaqstan Ǵylym Akademııasynyń akademıgi Ahmet Jubanov 1906 jyly 29 sáýirde Aqtóbe oblysynyń Muǵaljar aýdany, Qosýaqtam qystaǵynda dúnıege keldi. 1929 jyly Lenıngrad qalasyndaǵy M. Glınka atyndaǵy mýzyka tehnıkýmynyń A. Etıgonnyń skrıpka klasyna oqýǵa tústi, keıinnen N. Rımskıı-Korsakov atyndaǵy Lenıngrad memlekettik konservatorııasyna oqýǵa túsip, professor F. Nımannyń goboı klasynda jáne tarıhı-teorııalyq fakýltetinde bilim aldy. 1932 jyly Óner-zertteý akademııasynyń (keıin Teatr, mýzyka jáne kıno ınstıtýty) mýzyka bóliminiń aspırantýrasyna tústi.
Ahmet Jubanov - qazaq mýzyka mádenıetiniń kóp qyrly jáne kórnekti qaıratkeri, Qazaqstandaǵy kóptegen mýzykalyq óner ordalarynyń, sondaı-aq tuńǵysh qazaq memlekettik ult aspaptar orekestriniń belsendi uıymdastyrýshysy boldy.
