Almatyda Á. Jaqsybekovtiń tóraǵalyǵymen Qorǵanys mınıstrliginiń kóshpeli alqa otyrysy ótti

Otyrysta birinshi jartyjyldyqtaǵy jaýyngerlik jáne jedel ázirliktiń qorytyndylary shyǵaryldy. Áskerlerdiń daıyndyǵy jáne jaýyngerlik ázirlik sapasyn arttyrý máseleleri qarastyryldy. Qazaqstan áskeriniń qarý-jaraq jáne áskerı tehnıkasyn damytý tujyrymdamasy, sondaı-aq Qarýly Kúshter basshylyq quramynyń áskerı tártip pen quqyq tártibin qamtamasyz etý boıynsha jumystary talqylandy.

«Qarýly Kúshterdiń basym tapsyrmalarynyń biri - áskerlerdiń jedel jáne jaýyngerlik ázirlik kórsetkishin arttyrý. Elbasy - Qarýly Kúshterdiń Joǵarǵy Bas qolbasshysynyń bizge qoıyp otyrǵan talaby da osy», - dep atap ótti jıyn barysynda Qorǵanys mınıstri Ádilbek Jaqsybekov.

Ol sonymen qatar, «Qazaqstan áskeri jaýyngerlik ázirlikte negizgi salmaqty jeke quramnyń daıyndyǵyna baǵyttaıdy», - dep atap ótti. «Biraq bul sandy arttyrý degen sóz emes. Qazaqstan áskerindegi daıyndyq sapalyq sıpatqa ıe bolýy tıis. Búgingi tańda áskerler ártúrli áskerı qımyldar teatryndaǵy is-qımyldarmen oqytylýda. Jýyrda ǵana aıaqtalǵan «Shyǵys», «Qarataý» oqý-jattyǵýlary joǵary deńgeıde ótkenin atap ótken durys. Qazir mergender juby men arnaıy maqsattaǵy barlaý toptarynyń «Altyn úki» halyqaralyq jarysy ótýde. Qarýly Kúshterdi tehnıkalyq jaraqtandyrý da jaýyngerlik ázirlikpen tyǵyz baılanysty», - dedi ol.

Onyń aıtýynsha, áskerı qyzmetshilerdi áleýmettik qamtamasyz etý máselesi de barynsha mańyzǵa ıe. «Qazirgi ýaqytta «Áskerı qyzmet jáne áskerı qyzmetshilerdiń mártebesi týraly» Zań jobasy jasalýda. Bul qujattyń negizgi maqsaty - áskerı qyzmetshilerdiń áleýmettik qamtamasyz etilý júıesin jetildirý. Áleýmettik qamtamasyz etý kólemi qyzmet jaǵdaıyna baılanysty bolady», - dep atap ótti mınıstr.

Alqa otyrysynda jumyldyrý kúshteriniń daıyndyǵy da kóterildi. «Bul baǵytta osymen ekinshi jyl belsendi jumystar júrgizilip keledi. Memleket óziniń qaýipsizdigi maqsatynda jumyldyrý organynyń qalyptasqan júıesine ıe bolýy qajet. Jumyldyrý júıesi daǵdarys jaǵdaıynda Qarýly Kúshter qataryn daıyndalǵan mamandarmen tolyqtyrýǵa ázir bolýy tıis», - dedi vedomstvo basshysy.

Jıynda sonymen qatar, Qarýly Kúshterdiń basshylyq quramyn, serjanttar quramy jumysyn kúsheıtý jáne olardyń jaýapkershiligin arttyrý máseleleri de kóterildi. Sondaı-aq, jıynda áskerı qyzmetshilerdi medıtsınalyq qamtamasyz etý joǵary deńgeıde bolýy kerektigi aıtyldy. Sonymen qatar, otyrysta Qorǵanys mınıstrligi óz tarapynan Almaty, Astana qalalarynda zamanaýı medıtsınalyq keshender turǵyzyp jatqandyǵy habarlandy.