Almatyda A. Pýshkındi eske alý keshi ótti

Kesh aıasynda "Otan úshin ómir" atty derekti fılmniń tanystyrylymy boldy. Fılm jazýshy-pýshkıntanýshy Nıkolaı Raevskıı týraly baıandaıdy.

"Bul fılm negizinen 1987 jyly Qazaq televıdenıesinde Máskeýdiń Ortalyq televıdenıesimen, sonymen qatar Chehoslovakııa televıdenıesimen birigip túsirilgen bolatyn. Túsirilimder Almatyda, Pragada,Teplıtsada, Máskeýde, Lenıngrad jáne taǵy da basqa qalalarda Nıkolaı Raevskııdiń kózi tiri kezinde, óziniń qatysýymen jasalǵan. Fılm daıyn bolǵanda biz ony osy jerde kórsetken edik. Fılm "Tiri adamnyń haty" dep ataldy", dedi fılmniń rejısseri Aleksandr Golovınskıı.

Onyń aıtýynsha, fılm 90-shy jyldary, qaıta qurý kezinde belgisiz sebeptermen joǵalyp ketken. "Men sol fılmniń avtory, rejıssery retinde ony basqa elderden uzaq izdegen edim. Óıtkeni, Qazaqstanda Nıkolaı Raevskıı týraly túsirilgen birde -bir dúnıe qalmady. Biz sondyqtan, Reseı Memlekettik teleradıo qoryna habarlasyp, 1 jyldan asa kelissózder júrgizdik. Mine, fılmniń kóshirmesin Qazaqstandaǵy enshiles Reseı Jınaq bankiniń qarjylaı kómek berýiniń arqasynda elge qaıtaryp aldyq. Dál biz túsirgen fılm bolmasa da, bul lentada bizdiń túsirilimniń 90 paıyzy alynǵan", dedi rejısser A. Golovınskıı.

Ol sonymen qatar, «Nıkolaı Raevskııdiń shyǵarmalarynyń oqyrmandary kóp jáne avtordyń arqasynda pýshkıntaný salasy kitap súıer qaýymǵa qyzyqty boldy», dep atap ótti.